Formalisht, fashikujt për dy vrasjet, atë të shqiptares Nevila Pjetri dhe tranist Carlo Bertolotti vijojnë të jenë të veçuar, por dyshimi i hetuesve është se janë vrarë nga dora e Bedinit, në një distancë kohore prej 24 orësh. Çështje kohe duket tashmë përpara se autoritetet hetimore në Itali ta venë 32-vjeçarin italian Daniele Bedini zyrtarisht nën akuzë për vrasje të dyfishtë.
Corriere della Sera shkruan se këtë të shtunë ka dalë në dritë një tjetër fakt. Në shtëpinë e 32-vjeçarit në Carrara, janë gjetur dokumentet e transeksualit, së bashku me disa sende personale të viktimës. Këtë e konfirmojnë burime hetimore, shkruan mediat italiane, por edhe vetë avokati i Bedinit, në një intervistë për Rai.
Po ashtu, në orën 06:00 të mëngjesit të së dielës, 32-vjeçari është kapur nga një tjetër kamera sigurie. Bëhet fjalë për kameran e sigurisë së biznesit të familjes së të riut, që gjendet pranë shtëpisë së tyre.
Në këto imazhe, shihet Bedini duke u ngjitur në një tarracë për të hyrë në shtëpi. Veshur mban një bluzë dhe është shumë i trazuar. Del rreth gjysmë orë më vonë me një bidon që mban lëng të kuq, me gjasë alkool, që e vendos në makinë përpara se të niset.
Një natë më parë, autopsia në trupin e Camilla-s, transit 43-vjeçar që u gjet e vrarë 24 orë pas prostitutës shqiptare, zbuloi se ishte vrarë me dy plumba pistolete të kalibrit të vogël në pjesën e majtë të kokës. Nevila, sipas pamjeve që disponojnë hetuesit italiane, u detyrua nga vrasësi të ulej në gjunjë dhe u ekzekutua me tre plumba pistolete në kokë.
Bedini dyshohet se e mori me makinë 35-vjeçaren shqiptare në zonën ku ushtronte prostitucion, për ta çuar më pas, rreth orës 00:40 pranë lumit ku ajo u gjet e vrarë. Në orën 01:15, ishin dy afrikano-veriorë të cilët telefonuan karabinierët për të sinjalizuar një person që po tërhiqte një kufomë. Ata i thanë po ashtu policisë se e kishin dëgjuar t’i thoshte: “Këtë meriton”.
Bedini ndodhet aktualisht në burgun e La Spezia dhe deri më tani ka mohuar çdo akuzë.
Ai duhet të kishte qenë në burg prej 6 muajsh për një dënim me 3 vjet burg të dhënë Dhjetorin e shkuar për grabitje me pasoja të rënda. Megjithatë urdhri i ekzekutimit të dënimit erdhi vetëm pas arrestimit të tij për vrasje. Gjykata e Massa ka nisur hetime të brendshme, ndërsa për çështjen ka reaguar edhe vetë Ministrja italiane e Drejtësisë.
/e.d
