Nuk është se qeveria e kishte armik Dumanin, por me sa duket dy lobuesit e qeverisë kishin preferencë për dikë tjetër, dhe pas ndërhyrjen brutale të SHBA-së mori katër vota, falë votimit të të vetmit personalitet të pavarur brenda KLP-së, Sokol Stojani, që votoi Xholin.
Tani gjithë ambasadorët e Perëndimit në Tiranë po përpiqen të imitojnë Yuri Kim, pa qenë nevoja. Qeveria nuk ka ndonjë të preferuar mes katër kandidatëve dhe nuk shikoj ndonjë diferencë mes tyre. I vetmi dimension që nuk duhet ta ketë kryetari i SPAK është hakmarrja personale. Ajo do ta rëndonte gjithë procesin, por atë nuk e kuptojmë dot tani. Edhe te mandati i kaluar u kuptua, kur dy lobuesit kundër Dumanit, Veliaj dhe Balluku, përfunduan të pandehur. I pari i paraburgosur nëntë muaj para ngritjes së akuzës dhe sot është problem ndërkombëtar në çdo shqyrtim të ligjshmërisë së SPAK; tjetra është bërë objekt beteje mes qeverisë dhe drejtësisë për një precedent të panjohur më parë që ka të bëjë me pezullimin e mandatit si zëvendëskryeministre.
E gjithë kjo është kosto e atij tensioni me të cilin u zgjodh Dumani.
Tani mos e përsëritni një tension të panevojshëm për një garë që e ka në dorë KLP-ja. Kjo prania e ambasadorëve duket sikur ka ndonjë komplot dhe ata do ta zbulojnë. Aq më tepër që tani SHBA me Evropën kanë dhe prioritete të ndryshme, në pajtim me politikat e selive të tyre.
Lëreni KLP-në të zgjedhë kë të dojë nga ata që janë kandidatë, se SPAK ai që ishte do të jetë. Tani ata janë trimwruar aq shumë dhe ndihen aq të fortë, sa nuk kanë nevojë as për badigardë në sallë, as për ambasadorë dhe as për mbështetje publike.
Nëse vërtet kanë vënë në përgjim informal anëtarët e KLP-së, duhet hetuar me komision parlamentar. Të tjerat janë të parëndësishme. Steka e pandëshkueshmërisë është ngritur aq lart, sa edhe po të vësh Edi Ramën prokuror të SPAK-ut, do arrestojë kryeministrin Rama.
Ata tani kanë garë me njëri-tjetrin dhe janë duke shijuar një pushtet që nuk e kanë ditur që e kanë pasur. Ata nuk janë bërë të famshëm se kanë gjetur prova dhe kanë arrestuar peshqit e mëdhenj. Ata kanë arrestuar peshqit e mëdhenj dhe pastaj kanë dalë për gjah të gjejnë prova. Ndaj kështu e kanë suksesin e garantuar.
Ky eksperiment, që aty të ketë më shumë ambasadorë sesa anëtarë të KLP-së, është i shëmtuar dhe krijon iluzionin e gabuar edhe te shqiptarët se ata bëjnë çfarë u thonë të huajt. Në fakt do të ishte gjysma e së keqes. Ata bëjnë çfarë u thotë mendja e vet dhe në shumicën e rasteve nxjerrin dufet dhe komplekset e tyre të inferioritetit ndaj klasës politike në rastin e betejës kundër korrupsionit.
E vetmja fushë ku duhet t’u heqim kapelën janë betejat e tyre kundër krimit të organizuar. Aty, falë përgjimeve të gatshme nga SKY, EncroChat, kanë bërë një kërdi mbi bandat kriminale dhe duhen përgëzuar. Vetëm se edhe aty duhet të bëjnë kujdes të përputhin ligjshmërinë e provave me perceptimin që vjen nga bisedat e zbardhura, që të mos u ikin nga duart.
Sidoqoftë, katër vjet pas zgjedhjes së Dumanit, qeveria s’ka ndonjë preferencë, pasi një herë që pati, e pësoi, mori m¨ë qafue dy aktorët më të rëndësishëm të saj.
Tani sa më pak njerëz të ketë në atë sallë të enjten, përveç anëtarëve të KLP-së, aq më mirë do të jetë, pasi ai që do të zgjidhet së paku duhet t’ia dijë për nder meritave të veta dhe s’ka pse t’u jetë mirënjohës gjithë diplomatëve në sallë.
Shumica e atyre kanë hallet e veta. Ambasadorit Gonzato “SPAK-u” i BE-së sapo i ka marrë të pandehur shefat e vet me akuza të disktueshme; SHBA ka prioritet betejën kundër drogës dhe krimit të organizuar, kurse nëse shkon edhe ambasadori i Hungarisë aty, nuk e di çfarë prioriteti ka.
Ndaj është mirë t’i lini të votojnë të qetë.
