Kryeministri Edi Rama ishte në berat në një dëgjesë publike me qytetarët. Edhe në këtë takim ai foli për atë që e cilëson “koalicioni me njërëzit e zonshëm”.
Rama ironizoi kryetarët e dy partive të vogla opozitare, duke riktheksuar edhe njëherë se “tepsia do shkojë për skrap”.
“Çfarë ka Nard Ndoka apo Vangjel Dule më shumë se ajo zonja që foli? Kanë vetëm një avantazh, nuk ju vjen zor të dalin në televizor. Ata dinë si të hyjnë nga dritarja kur dalin nga dera. Janë mësuar me ato partitë e tyre që s’dihet si ekzistojnë, pretendojnë të bëhen edhe ministra, të fusin edhe kushërinjtë drejtorë. Pse këta kanë pretendime dhe një njeri i zakonshëm nuk mund të ketë”,- tha Rama.
Rama nënvizoi se, nga zgjedhjet e 25 qershorit, krahas fitores PS ka marrë edhe një përgjegjësi të madhe përsipër.
“PS duhet të tregojë se e meriton votën e shqiptarëve. Fitorja jonë është një barrë shumë e madhe përgjegjësie pasi më 25 qershor u votuam për të qeverisur vetëm”, tha Rama. Ai nënvizoi se reformimi i administratës nuk parashikon largimin e punonjësve të LSI-së dhe zëvendësimin e tyre me ata të PS-së njësoj si ata.
“Ne do shkurtojmë burokracinë në zyrat shtetërore. Problemet e qytetarëve do të adresohen në kohë reale”, tha Rama duke përsëritur zotimin se tepsinë do ta cojë për skrap./a.m.
