Mburren me plazhe mahnitëse, trashëgimi kulturore, monumente që të lënë pa mend dhe natyrë magjepsëse. Por, kanë frikë se turistët se mund të jenë spiunë apo agjentë të fshehtë.
Në vende ku ka diktaturë, liria e qytetarëve është e limituar dhe vizitorët e jashtëm mund të përballen me burg nëse e fyejnë liderin, bëjnë fotografi apo për shkak të orientimit të tyre seksuale.
Ekspertët që i kanë vizituar vendet diktatoriale, kanë dhënë këshillat e tyre se si të qëndrohet larg telasheve në një vend si Kuba apo Zimbabve.
Koreja e Veriut
Ky vend me diktaturë totalitare, i ka hapur pak dyert për turistët. Por, ata do të jenë të përcjellur gjatë tërë kohës nga shoqëruesit, derisa shëtisin nëpër Phenian, zonat e çarmatosura kufitare, plazhet apo Malin Paekdu.
Vizitorët duhet të respektojnë liderin Kim Jong-un, ndërsa kritikat, dëmtimi i bustit apo fotografisë së tij qoftë edhe në gazetë, shkakton probleme serioze, transmeton Telegrafi.
Turistët që shkojnë në këtë vend shumë të izoluar, duhet të kenë parasysh se mund të përballen me burg edhe nëse bëjnë një shkelje shumë të vogël. Kështu, në Korenë Veriore është i ndaluar fotografimi i ushtarëve, udhëheqësve shtetërorë dhe vendeve ku është duke u ndërtuar.
Aty është ilegale sjellja e materialeve pornografike, hartave, materialeve të shkruara nga mediet jashtë vendit, GPS-së, radios, telefonit satelitor, apo librave fetar si Kurani apo Bibla.
Kuba
I ka disa nga plazhet më të mira në Karaibe, por turistët që vizitojnë këtë vend me diktaturë ushtarake, duhet të kenë parasysh disa gjëra me rëndësi.
Kuba është vend njëpartiak ku prania e Ushtrisë dhe Policisë është shumë e madhe, ndërsa liria e shprehjes është e kufizuar.
Pushuesit paralajmërohen që të mos bëjnë fjalime publike, të mos mblidhen në grupe të mëdha, të shmangin zonat ushtarake dhe vende tjera të ndaluara.
Meqë homoseksualizmi është i ndaluar, çiftet e gjinisë së njëjtë duhet të kenë kujdes në publik, nëse nuk duan të ndalohen nga Policia.
Tajlanda
Në këtë vend është e ndaluar të kritikohet apo të shpifet për mbretin Bhumibol Adulyadej dhe monarkët tjerë. Po që se shkelet kjo ndalesë, është e dënueshme deri me 15 vite burg.
Por, pa dënim nuk mbetet turisti që proteston, bën propagandë, e fyen ndonjë ushtar apo shërbyes civil, siç është për shembull cicëroni që e shoqëron.
Bartja e narkotikëve është po ashtu e ndaluar, ndërsa ata që zihen duke kontrabanduar drogë, mund të dënohen edhe me dënim me vdekje.
Kina
Turistët që arrijnë në Kinë, duhet t’i nënshtrohen një testi të drogës dhe nëse rezultojnë pozitiv, ata do të jenë të përndjekur varësisht se ku shkojnë dhe çfarë bëjnë, transmeton Telegrafi.
Përdorimi i drogës mund të shkaktojë një varg problemesh, deri tek dënimi me burg të përjetshëm.
Turistët duhet të shmangin protestat, të mos fotografojnë apo regjistrojnë ato.
Thirrja për pavarësi të Tibetit dhe predikimi i çfarëdo lloj feje është i ndaluar.
Vizitorët duhet të kenë kujdes të mos përfshihen në ndonjë lojë kumari, sepse mund të përfundojnë të mbyllur në burg.
Zimbabve
Parqet Nacionale dhe rezervatet me luanë, elefantë dhe kafshë të tjera të egra, kanë bërë që ky vend i dërmuar ekonomikisht, të përfitojë të ardhura të mëdha nga turizmi.
Por, në Zimbabve turistët kontrollohen në detaje, për të parë nëse kanë me vete ndonjë material i cili mund të ofendonte presidenti Robert Mugabe apo zyrën e tij.
Turistët janë të ndaluar të fotografojnë Presidencën, zyrat e Qeverisë dhe ambasadave, pa një leje paraprake.
Në këtë vend, turistët duhet të jenë të sjellshëm dhe të respektueshëm, posaçërisht ndaj objekteve kulturore dhe historike, teksa duhet po ashtu të jenë falënderues për mikpritjen.
Egjipti
Ky vend me diktaturë ushtarake, ua ndalon rreptësishtë turistëve të marrin pjesë në ndonjë protestë, me frikën se situata mund të eskalojë dhe pastaj policët të përdorin armë të ftohta.
Turistëve u kërkohet të vishen me rrobe që u mbulojnë tërë trupin nëse vizitojnë xhamitë, zonat rurale dhe disa pjesë të caktuara të vendit.
Fotografimi është i ndaluar në shumicën e vendeve dhe zënia duke shkrepur mund të rezultojë me burg.
Ofendimi i kulturës dhe fesë është shumë i ndaluar dhe mund të jetë po ashtu rënd i dënueshëm.
