Shqipëria ka bërë hapa të rëndësishëm përpara në proçesin e reformave që lidhen me çeljen e negociatave për integrimin evropian.
Kjo u konfirmua qartazi edhe sot në Bruksel gjatë takimit me ministrat e jashtëm të vendeve anëtare të Bashkimit Europian dhe vendeve kandidate.
Ministrat e Jashtëm vlerësuan përkushtimin në vazhdimësi të Shqipërisë për axhendën e reformave dhe nënvizuan rëndësinë e rezultateve në reformën në drejtësi për ecurinë e integrimit evropian të vendit.
Një vlerësim i lartë u shpreh për rolin e Shqipërisë në rajon si një partner pro-aktiv dhe konstruktiv. Gjithashtu, gjatë takimit u vlerësua edhe qëndrimi i Shqipërisë në kuadër të nismave rajonale si dhe marrëdhëniet konstruktive dhe të fqinjësisë së mirë në rajon.
Ministri për Evropën Ditmir Bushati, i pranishëm në këtë takim thekson nëpërmjet një postimi në facebook se, “viti 2018 është shumë i rëndësishëm për ne dhe për rajonin”.
Ndaj, thekson ai, “procesi i zbatimit të reformave duhet të vijojë me këmbëngulje pavarësisht pengesave dhe rezistencës së aktorëve të ndryshëm politikë sepse çelja e negociatave për anëtarësim në BE është dhe duhet të përbëjë përparësi kombëtare”.
a.ç
