Kryetari i Partisë Republikane, Fatmir Mediu, i cili në kohën kur ndodhi shpërthimi i Gërdecit ishte ministër i Mbrojtjes, komentoi detaje nga dosja Gërdeci teksa bëhen 17 vite nga tragjedia që tronditi vendin.
Në studion e “Off the Record” nga Andrea Danglli, Mediu zgjodhi që të mos komentonte procesin e ngritur aktualisht ndaj kryebashkiakut Erion Veliaj.
“Kur më kanë pyetur për zotin Veliaj, nëse do të fitojë ai apo SPAK-u, u kam thënë dua të fitojë drejtësia. S’ka rëndësi kush është, Veliaj, Rama, Mediu. Po të isha Veliaj, do të kisha bërë atë që ka bërë Veliaj me mua. Se ka bërë gjyqtarin dhe prokurorin për 17 vite, ka folur si i ka ardhur për mbarë. Do të doja deri në fund, që edhe kundërshtarit më të madh, të mos i cënohet liria dhe e drejta,” deklaroi Mediu.
Ndërsa, i pyetur nëse pas 17 vitesh e ka një reflektim, Mediu thotë se reflektimi i tij ka qenë i menjëhershëm.
“Kam qenë ministri i parë që kam dhënë dorëheqjen. Pa ma kërkuar njeri. Se mendoj që ishte një përgjegjësi morale… më e rëndësishme sesa do të isha unë apo jo pjesë e Samitit të NATO-s, ishte një qëndrim moral në raport me Gërdecin. Janë 29 veta të gjykuar, hetuar, 24 janë dënuar.”
Sa i përket akuzës ndaj tij “shpërdorim detyre”, kryetari i PR-së thotë se nuk ka të bëjë me vetë shpërthimin në Gërdec.
“Nuk ka asnjë lloj lidhje me funksionin dhe detyrat e Ministrit të Mbrojtjes. Ministri i Mbrojtjes është civil. Nuk merret me armatim, nuk merret me transportin e municioneve…,” shpjegon ai.
Teksa theksoi se ai vetë nuk ka qenë asnjë herë të vetme në Gërdec, Mediu shtoi se ministri nuk mund ta dinte se diçka po shkonte keq me procesin e demontimit, nëse nuk i raportohej diçka e tillë.
“Ne diskutonim politikat. 15 ditë para se të ndodhte shpërthimi, ka pasur një mbledhje të shtabit, ku është cilësuar linja e Gërdecit, 100 herë më e mirë sesa projekti në Elbasan.”
I pyetur nëse mendon se e kanë gënjyer, Mediu përgjigjet:
“Mendoj që kjo ka qenë njohuria dhe dija e tyre për procesin. Nuk kam qenë asnjë ditë të vetme në Gërdec, s’kam pasur as edhe një kontakt me ta. Strukturat më të larta ushtarake, shefi i shtabit ka qenë në Gërdec Dhe ka thënë që çdo gjë funksiononte perfekt, si farmaci. Ku ta gjeja unë informacionin?”
Po ashtu, ai shtoi se as shërbimet inteligjente, as shërbimet ushtarake as strukturat komanduese, zbatuese nuk i sollën informacion se kishte diçka që nuk shkonte në Gërdec.
