(UPDATE)Moderatori i njour i “Zonë e Lirë” Arjan Çani ka reaguar pas deklaratave të bëra nga ai këtë të se çamët dhe sarandjotët, t’i vrasësh e kanë pak.
Në reagimin e tij Çani e cilëson këtë si një batutë e cila sipas tij është marrë jashtë kontekstit nga disa media për efekt klikimesh.
Ai sulmon gazetat që e kanë botuar këtë si lajm, duke thënë se e kanë bërë qëllimisht. Megjithatë edhe pse mund ta cilësojë një batutë, moderatori duhet të bëjë kujdes në batutat e tij, pasi sado e lirë të jetë zona e shprehjes ai në bazë të Kodit Penal rrezikon 2-10 vite burg.
“Siç ndodh rëndom në këtë katund, mjafton një batutë me humor brenda një konteksti të caktuar që disa media të përfitojnë për të pasur ca klikime më shumë. Në fakt janë media që mbijetojnë vetëm me spekullime të qëllimshme. Nxjerrin gjithçka nga konteksti dhe kaq mjafton që një tufë debilësh dhe parazitësh anonimë që vrasin kohën e tyre nëpër blogje, të turren e të të bëjnë copë në fyerje e sharje nga më të rëndomtat. Por kjo mua nuk më shqetëson aspak sepse këtë kategori humanësh të dobët e njoh mir qysh kur punoja para 15 vjetesh në radio netëve vonë. Kjo kategori janë fansat e mi të pasherueshëm që s’më janë ndarë asnjëherë. Sa më shumë i shaj unë, aq më shumë më duan ata. Janë mazokistë ndonëse ata nuk e dinë sëmundjen e tyre. Un i dua shumë këta tipa. Janë të njëjtët. Si dikur në radio, edhe tani nëpër blogje. Është gazeta e Mero B. dhe një tjetër e dy të fortëve të pushtetit që jetojnë me gjoba. Fletushka të neveritshme të cilat nuk kanë marrë asnjëherë mundimin të më bënin qoftë dhe një telefonatë para se të përmendnin emrin tim në paçavurret e tyre. Po nejse. Batuta e çameve që ka ngjallur sërish këtë polemikë ishte thjeshtë një batutë brenda një konteksti plot humor. Për të gjithë ata që kanë fare pak mënd në kokë, le ta shohin ose rishohin emisionin tim të dates 8 maj 2015 në youtube. Ciaooo”, është shprehur Çani në reagimin e tij.
Dy nenet e Kodit Penal që i ndalojnë deklarime të tilla publike:
Neni 265
Nxitja e urrejtjes ose grindjeve (Ndryshuar neni me ligjin 144/2013, datë 2.5.2013, neni 41)
Nxitja e urrejtjes dhe e grindjeve, për shkak të racës, etnisë, fesë ose orientimit seksual, si dhe përgatitja, përhapja ose ruajtja, me qëllim përhapjen e shkrimeve me përmbajtje të tilla, e kryer me çdo mjet ose formë, dënohet me burgim nga dy deri në dhjetë vjet.
Neni 266
Thirrja për urrejtje nacionale (Ndryshuar me ligjin 144/2013, datë 2.5.2013, neni 42)
Vënia në rrezik e paqes publike duke bërë thirrje për urrejtje kundër pjesëve të popullsisë, duke i fyer ose shpifur për to, duke kërkuar përdorimin e dhunës ose të veprimeve arbitrare kundër tyre, dënohet dënohet me burgim nga dy deri në tetë vjet.
