Ministri në Detyrë për Evropën dhe Punët e Jashtme Gent Cakaj, zhvilloi një takim me Kryetarin e Parlamentit të Maqedonisë së Veriut, Talat Xhaferi.
Ministri Cakaj vlerësoi kontributin e çmuar të Kryetarit Xhaferi në finalizimin e Marrëveshjes së Prespës me miratimin e ndryshimeve kushtetuese.
“Aderimi i Maqedonisë së Veriut në NATO dhe rruga e përbashkët drejt BE-së është vlerë e shtuar për zhvillimin e rajonit dhe veçanërisht për kultivimin e paqes dhe stabilitetit”, u shpreh Cakaj në fjalën e tij.
Nga ana e tij, Kryetari i Parlamentit Xhaferi, shprehu mirënjohjen për mbështetjen që ka dhënë Shqipëria në këtë proces duke qenë njëkohësisht dhe një nga vendet e para në ratifikimin e Protokollit të Anëtarësimit të Maqedonisë së Veriut në NATO.
Kryeparlamentari Xhaferi theksoi se: “Republika e Maqedonisë së Veriut është në rrugë të sigurt drejt NATO-s, ndërsa vendi po punon me përkushtim në përmbushjen e reformave dhe detyrave të domosdoshme për marrjen e datës së fillimit të negociatave me BE-në“.
Kreu i diplomacisë shqiptare rikonfirmoi angazhimin maksimal të palës shqiptare për agjendën evropiane të Republikës së Shqipërisë në bashkëpunim të sinqertë me të gjitha vendet e BP, dhe Maqedonisë në veçanti.
E.Xh./
