Buxheti për 10-mujorin e vitit 2018 është mbyllur me 1,5 miliardë lekë suficit. Të ardhurat totale të arkëtuara nga administrata u realizuan në vlerën e 370 miliardë lekëve.
Sipas shifrave zyrtare të Ministrisë së Financave, të ardhurat u rritën 13,7 miliardë lekë apo 3,8 për qind më shumë se e njëjta periudhë e 2017-ës. Të ardhurat nga TVSH-ja, treguesi kryesor i qarkullimit të konsumit në buxhet, në total u realizua në vlerën 118.5 miliardë lekë, me rritje 3.5 për qind ose 4 miliardë lekë më shumë se 10- mujori i vitit 2017.
Ministria e Financave shpjegon se rënia e kursit të këmbimit të euros kundrejt monedhës vendëse ka dhënë efekte të ndjeshme negative në uljen e të ardhurave nga TVSH-ja në import për të gjitha kategoritë e mallrave. Të ardhurat totale nga tatimet dhe doganat u realizuan në vlerën 325,7 miliardë lekë ose 13,8 miliardë lekë më shumë se 10- mujori i vitit 2017. Të ardhurat nga akciza janë realizuar në vlerën 37,2 miliardë lekë.
Ndikim ka pasur importimi i karburantit, si dhe prodhimi vendës që rezultoi rreth 486,430 tonë, me një rritje prej 19,753 tonë ose 4,2 për qind më shumë krahasuar me 10-mujorin e vitit 2017. Shpenzimet e përgjithshme për muajin e dhjetë të vitit 2018 arritën në rreth 368,5 miliardë lekë, me një rritje prej 2,4 për qind më i lartë ose rreth 8.6 miliardë lekë më shumë krahasuar me të njëjtën periudhë të vitit 2017. Të dhënat e Ministrisë së Financave tregojnë se shpenzimet për investime u realizuan në rreth 49,9 miliardë lekë ose 3,37 miliardë lekë më shumë se 2017-ta./a.meta
