Buxheti i vitit 2017 do të mbështetet në rritjen me 5.3% të të ardhurave, kryesisht nga zëri Tatimi mbi Vlerën e Shtuar. Paratë e grumbulluara do të shkojnë për rritje pagash e pensionesh dhe shtim të investimeve publike. “Gazeta Shqiptare” ka siguruar projektbuxhetin, sipas të cilit mësohet edhe ndarja e fondeve për çdo institucion. Kështu, për vitin e ardhshëm do të ulet buxheti për Presidencën e Kuvendin dhe do të rritet për Këshillin e Ministrave, Ministrinë e Transporteve dhe atë të Shëndetësisë. Ministria e Jashtme, Ministria e Brendshme dhe Ministria e Mbrojtjes do të kenë ulje të fondeve në vitin 2017. Në tabelën përbri shkrimit janë të pasqyruara fondet për çdo dikaster, sa janë për këtë vit dhe sa janë parashikuar për vitin e ardhëm.
TREGUESIT FISKALË
Sipas tabelës së treguesve fiskalë mësohet se të ardhurat tatimore pritet të arrijnë në 398.2 miliardë lekë, me një rritje rreth 6%, ose 22.4 miliardë lekë më shumë se në buxhetin e rishikuar të vitit 2016. Tri zërat që do të mbajnë peshën kryesore në rritjen e të ardhurave janë tatimi mbi fitimin, me rritje 4.4 miliardë lekë në raport me planin e 2016-ës ose 18% më shumë, taksa nacionale, me një rritje prej 4.4 miliardë lekë më shumë të ardhura në buxhet, dhe tatimi mbi të ardhurat personale, me një rritje prej 3.7 miliardë lekë ose 11.6% më shumë se viti 2016. TVSH-ja pritet të ketë një rritje modeste prej 2.1%, apo rreth 2.9 miliardë lekë, në raport me buxhetin e rishikuar 2016. Të ardhurat nga pushteti vendor pritet të rriten me rreth 6%, për të arritur në 15.4 miliardë lekë.
“Me rritje të lartë priten edhe të ardhurat nga sigurimet shoqërore, që parashikohet të zgjerohen me 3.3 miliardë lekë ose 5% më shumë. Zëri i të ardhurave jotatimore pritet të arrijë 24.4 miliardë lekë, me rënie prej rreth 5%. Në total, qeveria pret që të shpenzojë 469.5 miliardë lekë, me një zgjerim prej 4.3% në krahasim me vitin e kaluar. Me rënie të ndjeshme janë shpenzimet për buxhetin lokal, që pritet të jetë 40.6 miliardë lekë, nga 48.3 miliardë lekë vitin e mëparshëm. Rënien më të fortë e kanë grantet për buxhetin lokal, që janë parashikuar vetëm 13.5 miliardë lekë, me një tkurrje prej 17.2 miliardë lekë. Sipas relacionit të projektbuxhetit, deficiti buxhetor për vitin 2017 parashikohet të jetë në nivelin 2.6% të PBB, nga 2.1% e PBB-së që është planifikimi për vitin 2016. Rritja e deficitit me rreth 0.5 pikë përqindje, nuk do të ketë ndikim mbi angazhimin e qeverisë për të reduktuar nivelin e borxhit publik në periudhën afatmesme dhe afatgjatë, pasi balanca primare parashikohet të jetë pozitive dhe rritja ekonomike relativisht më e lartë se deficiti i përgjithshëm”, thuhet në relacion.
