Ministri i Financave, Arben Ahmetaj, prezantoi dje në Komisionin e Ekonomisë projektbuxhetin dhe paketën fiskale të vitit 2017. Ministri Ahmetaj tha se buxheti financon 100 milionë dollarë për rritjen e pagave dhe pensioneve. Rrogat për arsimtarët, mjekët dhe punonjësit e policisë do të rriten 10 për qind. Pagat e buxhetorëve do të rriten 7 për qind, rrogat e ulëta 36 për qind, ndërsa pensionet 3 për qind. Prezantimi i buxhetit u shoqërua me debate dhe opozita nuk mori pjesë në votimin e kalendarit të punës së komisionit për shqyrtimin e ligjit.
PAGAT
Ministri i Financave, Arben Ahmetaj, tha para deputetëve të Komisionit të Ekonomisë se buxheti i 2017 është buxheti i rritjes së pagave dhe pensioneve. Ministri tha se për rritjen e pagave dhe pensioneve, fondi i buxhetit llogaritet 100 milionë dollarë. Për rritjen e pagave, Ahmetaj u ndal në kategoritë përfituese si mjekët, infermierët dhe mësuesit. Efekti financiar për rritjen e pagave do të nisë nga 1 prilli.
“Është buxheti i rritjes së pagave dhe pensioneve. Për herë të parë rreth 100 milionë dollarë me efekt 12-mujor për rritjen e pagave dhe pensioneve është fondi më i madh i akorduar në buxhet në këto 25 vjet”, tha ministri. Rritja e pagave për mësuesit do të jetë 10 për qind, ku përfitojnë rreth 36 mijë arsimtarë.
“Fondi i rritjes së pagave vetëm për 2017 me efekt 12-mujor do të ishte 7.2 miliardë lekë. Pagat për mësuesit janë 36.630 punonjës arsimor që do të fitojnë mesatarisht 10 për qind rritje page në 2017. Paga mesatare bruto për një mësues të shkollës nëntëvjeçare në 2013 ka qenë 61.100 lekë, sot është 64.650 lekë. Ndërsa për një mësues të shkollës të mesme ka qenë 64.100 lekë, në 2013 ka shtuar 68.000 lekë”, tha Ahmetaj. Edhe pagat e mjekëve dhe infermierëve do të rriten 10 për qind.
“Për vitin 2017, reforma e ndërmarrë për rritjen e pagave në administratën publike shoqërohet edhe me rritjen e pagave të punonjësve të sistemit shëndetësor publik. Pagat e mjekëve dhe infermierëve do të rriten me 10 për qind. Përfitojnë 18.415 personal mjekësor dhe infermierë, nga të cilët 4650 mjekë dhe 13.765 infermierë. Fondi i parashikuar për t’u akorduar është 1.5 miliardë lekë”, tha Ahmetaj.
PENSIONET
Nga 1 marsi i vitit të ardhshëm, pensionet do të rriten 3 për qind. Fondi i buxhetit për të financuar rritjen nga 1 marsi do të jetë 2.6 miliardë lekë. Përfitues do të jenë 635 mijë pensionistë në të gjithë vendin. Ministri Ahmetaj u ndal në Komision në shtimin e numrit të përfituesve nga pensioni social.
“Me sistemin e vjetër, nuk ka ekzistuar koncepti i pensionit social dhe ky është përfitimi i drejtpërdrejtë për qytetarin dhe pensioni social është vendosur 6585 lekë në muaj. Në vitin 2015 përfituan pension social 1175 qytetarë, që do të ishin lënë në mes të rrugës. Në vitin 2016 është shtuar numri i përfituesve. Në 2017 shkojnë qytetarë përfitues të pensionit social do të jenë 5070 qytetarë”, tha Ahmetaj.
DEBATI
Opozita kërkoi që të bëjë oponencën për buxhetin pas përfundimit të prezantimit nga ministri, por nuk u lejua nga kryetari i Komisionit të Ekonomisë, Erion Braçe, pasi, sipas tij, është në kundërshtim me rregulloren.
Deputetët e opozitës e cilësuan një rast të paprecedentë, por kreu i Komisionit të Ekonomisë u citoi atyre rregulloren që përcakton debatin për buxhetin. “Debati në parim fillon me paraqitjen e buxhetit të shtetit nga ministri i Financave, me dëgjimin e relatorëve kryesorë dhe vijohet me diskutimet e përgjithshme dhe votimin në parim”, citoi Braçe rregulloren.
ma.me
