Reforma në Drejtësi pritet që të transformojë tërësisht pallatin e drejtësisë, por sipas deputetit socialist Ervin Bushati, partitë opozitare kanë penguar ecurinë e këtij procesi për miratimin e ligjeve dhe ngritjen e organeve të reja të drejtësisë.
Gjatë një interviste televizive Bushati theksoi se Reforma në Drejtësi në Shqipëri është një histori suksesi, duke shtuar se mazhoranca ka treguar vullnet për ta çuar përpara këtë reformë.
“Ne kemi adresuar Reformën në Drejtësi për të riformatuar tërësisht sistemin e drejtësisë. Kjo nuk është një arkitekturë vetëm e jona, patjetër që jemi ndihmuar edhe nga partnerët tanë. Ndryshimet Kushtetuese tregojnë vullnetin tonë. Jemi i vetmi vend në botë që kemi brenda në Kushtetutë një trupë monitorimi, për të na treguar se si bëhet drejtësia. Jemi penguar në çdo hap për të miratuar ligjet e tjera nga ana e opozitës dhe këtë duhet ta pranojmë. Shumë shpejt institucionet do të ngrihen. SPAK, KLP dhe KLGj shumë shpejt do të fillojnë punë, dhe kryefjala e parë që e thonë edhe ndërkombëtarët është Reforma në Gjyqësor. Reforma në Drejtësi është një histori suksesi”, – u shpreh Bushati.
Deputeti socialist u ndal edhe te protesta e opozitës, e cila sipas tij po dramatizohet në një mënyrë artificiale nga ana e saj.
“Po të marrim parasysh datën e protestës së opozitës, e cila do të zhvillohet pasdite, çfarë do të thotë kjo, që po presin natën që të ndodhë diçka dramatike? Në mendimin tim opozita po kërkon dramatizimin e situatës në mënyrë artificiale, prandaj protestat po zhvillohen pasditeve. Koha nuk punon për PD-në. Momentin e liderit, zoti Basha e kishte kur dorëzoi mandatin, kur hipi në një podium të improvizuar. Për të rikapur një nivel tjetër energjie apo emotiviteti të opozitarizmit, do të kërkojnë që të bëjnë diçka më dramatike dhe dramatiken nuk dua që ta vuajë shoqëria shqiptare. PD ka zgjedhur njeriun e gabuar, nuk arrin dot në pushtet, ne nuk ja ndërrojmë dot kapitenin”, – theksoi Bushati.
/a.rada
