Ministri për Evropën dhe Punët e Jashtme Ditmir Bushati, ka reaguar nga Shkodra pas deklaratave të forta të eurodeputetes gjermane Doris Pack, e njohur për qëndrimet pro Partisë Demokratike.
“Si anëtar i kabinetit shpreh gjithë solidaritetin tim për punën e forcave të sigurisë. Sikundër nuk diskutohet që është përgjegjësi e autoriteteve përkatëse për të marrë masa korrigjuese, aty ku forcat e zbatimit të ligjit nuk funksionojnë siç duhet. Është kënaqësi për mua të dëgjoj që Doris Pack edhe pse sot është në pension, ka pasur mundësi të jetë si një vizitore në Shkodër, pasi Shkodra simbolizon gjithçka” komentoi Bushati
Dy ditë më parë, Doris Pack u shpreh nga Shkodra se ishte e shokuar nga kriminaliteti në këtë qytet.
“Jam e shokuar nga situata e kriminalietit në Shkodër. Janë 6 vrasje dhe dy të zhdukur. Diskutohet përfshirja e policisë dhe vetë ministrit. Nëse qeveria nuk arrin të kapë kriminelët, nuk meriton të futet në BE. Shqiptarët po ikin jo se nuk e duan vendin, por se nuk kanë siguri. Ka një lloj mafie këtu. S’mund ta imagjinoj se kjo ndodh në një vend që po hap negociatat. Jam e tërbuar që një qeveri e tillë nuk po ju mbron dhe kjo nuk ndodh vetëm në Shkodër por dhe në Tiranë dhe Vlorë, Për sa kohë që qeveria nuk është në gjendje të frenojë mafian, ta dërgojë atë para Gjykatës dhe në fund, në burg. Unë e pëlqej Shqipërinë dhe dua të jetë pjesë e Evropës. Dua qytetet, dua njerëzit. Dhe nuk i kuptoj ministrat që nuk flasin qartë dhe hapur. Qeveria nuk po merret me sigurinë e njerëzve”, deklaroi Doris Pack.
Edhe ditën e djeshme, eurodeputetja gjermane Doris Pack u shfaq në krah të kryetarit të opozitës, Lulzim Basha, në Konferencën Ballkanike të Gruas që u zhvillua në Tiranë.
ma.me
