Ministri i Punëve të Jashtme, Ditmir Bushati, priti mesditën e kësaj të marte në një takim, homologun e tij italian, Angelino Alfano.
Gjatë konferencës së përbashkët për shtyp, dy ministrat iu referuan dhe situatës politike në Shqipëri.
“Ne mbështesim procesin e reformave të Shqipërisë që përkon me 5 pikat, prioritete kyçe të përcaktuara në Këshillin e dhjetorit 2015. Nuk mund të futem në dinamikën politike të një vendi tjetër, sepse është një vend i lirë dhe sovran”, tha Alfano.
Ndërsa nga ana e tij, ministri Bushati përsëriti se zbatimi i ligjit të Vettingut mbetet kushti për çeljen e negociatave të anëtarësimit në BE.
“Mendoj që Reforma në Drejtësisë dhe Vettingu është elementi thelbësor jo thjesht për hapjen e bisedimeve për anëtarësim me BE, por hapi themelor për ringritjen e besimit të qytetarëve shqiptarë te institucionet e shtetit të së drejtës dhe spastrimin e Pallatit të Drejtësisë nga ata gjyqtarë dhe prokurorë që s’kanë lidhje me këto funksione.
Ne i kemi miratuar ndryshimet në kushtetutë dhe paketën ligjore të reformës në unanimitet të plotë, si rrallëherë në politikën shqiptare. Dhe kjo reformë nuk ka kthim pas”, u shpreh Bushati. /b.d
