Të paktën 12 të burgosur u vranë në përleshjet e reja që shpërthyen në një burg në portin ekuadorian të Guayaquil, tha të shtunën zyra e prokurorit, dhuna e fundit vdekjeprurëse që tronditi burgjet e qytetit.
“Është hapur një hetim për të identifikuar ata që janë përgjegjës për vdekjen e 12 të burgosurve nga burgu Litoral në Guayaquil”, tha zyra e prokurorit në Twitter, një ditë pasi shpërthyen përleshjet.
Gjashtë të arrestuar u gjetën të varur të mërkurën në të njëjtin burg në Guayaquil, një qytet i madh port në Ekuadorin jugperëndimor i goditur nga dhuna e lidhur me trafikun e drogës.
Të nesërmen, tre roje burgu u vranë ndërsa ishin jashtë kompleksit të burgut në qytet. Dhe të premten, të paktën tre të burgosur u plagosën në përleshjet me armë në të njëjtin burg.
Burgjet e Ekuadorit janë skena e masakrave të përsëritura midis të burgosurve, në një sfond rivaliteti midis grupeve kriminale që luftojnë për kontrollin e trafikut fitimprurës të drogës.
Që nga shkurti i vitit 2021, në këto burgje janë regjistruar tetë masakra, me më shumë se 400 të burgosur të vrarë, shumica e tyre të copëtuar dhe djegur.
Porti kryesor i vendit në bregun e Paqësorit, Guayaquil është bërë vitet e fundit epiqendra e trafikut të drogës në Ekuador, e vendosur midis Kolumbisë dhe Perusë – prodhuesit kryesorë të kokainës në botë.
/e.d
