Gjykata e Apelit për Krimet e Rënda ka hedhur poshtë vendimin e Shkallës së Parë duke dhënë vendimin me burg për jetë për Arben Frroku.
Por Frroku, i akuzuar për vrasjen e komisarit të policisë Dritan Lamaj, nuk ka qenë sot në sallën e gjyqit. Ai është përfaqësuar nga avokati i tij, Genc Gjokutaj, ndërsa ky i fundit u shpreh se vendimi i Apelit është pasojë e presionit politik në vend.
Nga ana tjetër, familjarët e Frrokut kanë pohuar se ai nuk ndodhet fare në Shqipëri. Nuk dihet nëse pas këtij vendimi do të shpallet një urdhër ndalimi ndërkombëtar për Arben Frrokun, apo nëse ai do të vetëdorëzohet.
Pas lirimit nga Gjykata e Shkallës së Parë për Krimet e Rënda, Frroku nuk ka dhënë asnjë deklaratë për shtyp apo të komentojë për mediat arrestimin, dënimin dhe lirimin e tij.
