Shtetet e Bashkuara po shqyrtojnë një skenar të rrezikshëm ushtarak ndaj Iranit, ku në qendër është ishulli strategjik Kharg, një nga pikat më të rëndësishme për eksportin e naftës iraniane, raporton CNN.
Ishulli Kharg konsiderohet objektiv kyç për administratën e Donald Trump, pasi kontrolli i tij mund të godasë rëndë ekonominë e Iranit dhe të detyrojë Teheranin të hapë Ngushticën e Hormuzit.
Kharg Island përpunon deri në 90% të eksporteve të naftës së Iranit, çka e bën atë një “arterie jetike” për vendin dhe një objektiv me peshë strategjike për çdo operacion ushtarak.
Megjithatë, një sulm apo pushtim i mundshëm konsiderohet jashtëzakonisht i rrezikshëm. Ekspertët paralajmërojnë se ishulli është i fortifikuar me sisteme mbrojtëse, mina dhe raketa, ndërsa Irani ka shtuar praninë ushtarake dhe mbrojtjen ajrore në zonë.
Analistët ushtarakë theksojnë se një operacion i tillë do të kërkonte mijëra trupa dhe mbështetje të madhe ajrore e detare, ndërsa mbajtja e ishullit do të ishte edhe më e vështirë për shkak të sulmeve të mundshme nga territori iranian.
Nga ana tjetër, SHBA ka rritur ndjeshëm praninë ushtarake në rajon, duke përgatitur opsione për një “goditje përfundimtare”, ndërsa tensionet mbeten të larta dhe negociatat nuk kanë dhënë rezultat.
Kontrolli i Kharg Island lidhet drejtpërdrejt me fatin e Ngushticës së Hormuzit, një rrugë kyçe ku kalon rreth një e pesta e naftës globale. Çdo përshkallëzim në këtë zonë mund të ketë pasoja të mëdha për tregjet ndërkombëtare dhe sigurinë energjetike globale.
