Agim Madani, i shumëkërkuari në Shqipëri dhe në Kosovë për vrasje, përdhunim e grabitje, dyshohet të jetë një prej viktimave të gjetura dje në një fshat të Tropojës, shkruan Panorama.
Bashkë me burrin e dyshuar si 50-vjeçari Madani, u zbulua dhe trupi i një femre. Të dy kufomat dyshohet të kenë ndërruar jetë para 6 muajsh nga gjetja e tyre mëngjesin e djeshëm. Çifti ka jetuar së bashku, nisur nga provat e gjetura në vendngjarje, por për policinë është ende mister shkaku i vdekjes. Nga të dhënat paraprake nuk ka shenja për vrasje, edhe pse ekspertiza pritet të tregojë arsyen e vdekjes.
Çifti u gjet i vdekur brenda një kasolleje të ndërtuar prej tyre, në një fshat të Tropojës. Kufomat, një mashkull dhe një femër, me moshë të pacaktuar ende saktësisht, u zbuluan ditën e djeshme nga një bari, i cili është tronditur nga skena.
Dyshimet
Burime jozyrtare bëjnë të ditur se dyshimet kryesore për identitetin e burrit bien mbi Agim Madanin, 50- vjeçarin më të kërkuar nga Policia e Tropojës dhe ajo e Kosovës.
Me 6 gusht të viti 2014, Agim Madani ka vrarë një mikun e tij me plumb në kokë. Ai kishte marrë leje nga burgu i Shënkollit, ku vuante dënimin dhe më pas kishte shkuar në Tropojë, për të mos u kthyer më në qeli.
Viktima, Shpëtim Sinani, rreth 40 vjeç, ishte mik i afërt i tij dhe policia fillimisht tha se vrasja kishte ndodhur për shkak se autori dhe viktima grabisnin dhe kishin bërë sherr për çështjen e ndarjes së plaçkës që grabisnin. Më pas Madani u largua në drejtim të paditur, ndërsa ngjarja u harrua.
Policia kosovare e ka identifikuar atë si autor të një serie grabitjesh, ndërsa akuzohet dhe për plagosjen e një punonjëse policie në Pejë. Vetë Agim Madani përdorte telefon dhe madje në rrjetet sociale qarkullonte një foto e tij gjatë kohës kur ishte në kërkim. Gjatë kësaj kohe mendohet të ketë gjetur dhe një grua, me të cilën qarkullonte në vendbanime të sajuara në Kosovë dhe Shqipëri.
Ndërsa burri mendohet të jetë Agim Madani, për gruan nuk ka asnjë dyshim. Ndërkaq, mister është dhe vdekja e tyre. Nga ana e policisë është përjashtuar paraprakisht krimi, pasi nuk ka shenja dhune apo goditje me armë zjarri te të dy viktimat. Ekspertiza pritet të zbulojë nëse ka ndodhur ndonjë helmim i qëllimshëm apo në rrethana të tjera ka ndodhur vdekja e dyfishtë.
Panorama
