‘Reforma territoriale do të sjellë një zhvillim të mëtjeshëm të bujqësisë’. Kështu deklaroi kryeministri Edi Rama gjatë një takim elektoral në Lezhë, në fokus të të cilit ishte bujqësia dhe mbështetja e saj.
I shoqëruar dhe nga ministri i Bujqësisë, Edmond Panariti, Rama ka deklaruar se qeveria po shqyrton të gjitha strategjitë që të vijojë rrugën dhe drejtimin e duhur.
“Reforma e re territoriale bën që pushteti vendor të jetë më afër fermerëve. Njësitë bashkiake do të kthehen në njësi zhvillimi ekonomik, ku si kurrë më parë marrëdhënia mes qeverisë vendore dhe fshatit merr peshë të veçantë. Sot jemi në kushtet kur nuk mund të themi se i zgjidhëm problemet e bujqësisë apo të fshatit, por mund të themi se eksperienca e 18 muajve në qeverisje, në raport me fshatin dhe rezultatet e para të politikës sonë të re për zhvillimin e fshatit tregojnë se jemi në drejtimin e duhur”, ka deklaruar shefi i qeverisë.
Ai ka vlerësuar se, plani i qeverisë për bujqësinë është rruga më e shpejtë për të fuqizuar familjen fermere, e cila sipas tij nuk duhet të bazohet vetëm tek ajo që përpiqet të shesë në tregjet e rrugëve.
“Ne jemi zotuar që do të rimbursojmë TVSH-në për inputet dhe e bëjmë këtë sot, por ne nuk do bëjmë atë që është bërë për vite me radhë, që të japim parapragim, duke stimuluar korrupsion, kontrabandë dhe informalitet”, ka shtuar Rama.
