Banka e Shqipërisë bëri të ditur rezultatet e vrojtimit të aktivitetit kreditues të tremujorit të dytë të vitit 2016, të cilat tregojnë për shtrëngim të standardeve të kreditimit të bizneseve dhe për lehtësim të standardeve të kreditimit për individët.
Sipas BSh-së, për bizneset, standardet rezultojnë të shtrënguara, si për ndërmarrjet e vogla dhe të mesme, ashtu edhe për ndërmarrjet e mëdha. Ndërkohë, standardet për kreditë dhënë individëve janë lehtësuar për kredinë konsumatore dhe nuk kanë ndryshuar në segmentin e kredisë për blerje banese.
Faktorët kryesorë që ndikuan në shtrëngimin e standardeve të bankave për kredinë dhënë bizneseve janë problemet specifike të sektorit dhe situata makroekonomike, vëren BSH-ja. Ndërsa faktorët që ndikuan në lehtësimin e standardeve të kredisë për individët janë konkurrenca, mjaftueshmëria e kapitalit dhe gjendja e likuiditetit.
Sipas Bankës Qëndrore, kreditë me probleme mbetën një faktor me ndikim negativ në kushtet e kreditimit, si për bizneset edhe për individët. Politika shtrënguese e bankave ndaj kreditimit të bizneseve u zbatua kryesisht nëpërmjet rritjes së kërkesave për kolateral dhe uljes së maturitetit të kredisë së dhënë.
Ndersa politika lehtësuese në segmentin e individëve u zbatua kryesisht nëpërmjet ngushtimit të marzhit mesatar për kreditë./a.k
