Komisioni Evropian u shpreh i shqetësuar për borxhin publik italian, një rrezik që ndikon, sipas tij, në të gjithë zonën euro duke vënë nën presion një qeveri që do të përballet me zgjedhje legjislative në pranverë.
“Niveli i borxhit publik e bën Italinë të ndjeshme. (…) Duke pasur parasysh dimensionin e ekonomisë së saj, ky është një burim shqetësimi për zonën euro në tërësi”, paralajmëroi Komisioni në një letër drejtuar sot ministrit italian të Financave, Pier Carlo Padoan.
Ekonomia e tretë mes 19 vendeve që kanë miratuar monedhën unike njofton në fakt një borxh publik shumë të lartë, i dyti më i lartë në gjithë Bashkimin Evropian pas atij të Greqisë.
Gjithashtu, sipas parashikimeve të Komisionit Evropian, paraqitur më 9 nëntor, borxhi publik italian kulminoi në vitin 2017 me 132,1 për qind të Prodhimit të Brendshëm Bruto (PBB), për të shënuar një rënie të lehtë me 130,8 për qind në 2018 dhe 130,0 për qind në 2019.
Në shkallë krahasuese, mesatarja për vendet e zonës euro është rritur me 89,3 për qind të PBB-së në 2017, 87,2 për qind në 2018 dhe 85,2 për qind në 2019.
“Ne kemi nënshkruar me zëvendëspresidentin e Komisionit Evropian, Valdis Dombrovskis, një letër për Padoan për t’i kërkuar sqarime”, theksoi komisioneri evropian për Çështjet Ekonomike, Pierre Moscovici, në një konferencë shtypi kushtuar projekteve të ndryshme të buxhetit të shteteve anëtare të zonës euro./b.d
