Bashkimi Evropian i ka bërë thirrje Hungarisë të ndihmojë në ruajtjen e vlerave të bllokut, pasi kryeministri i krahut të djathtë, Viktor Orban, ka shpallur siç është shprehur fitoren historike në zgjedhjet e përgjithshme, duke fituar të drejtën për mandatin e tretë radhazi
“Bashkimi Evropian është bashkim i demokracive dhe vlerave”, ka thënë zëdhënësi i Komisionit Evropian, Margaritis Schinas, duke shtuar se ruajtja e këtyre vlerave është “detyrë e përbashkët e të gjitha shteteve anëtare, pa përjashtim”.
Brukseli ka përsëritur përplasjet me Orbanin për politikat e tij antimigrim dhe kundërshtimin e programit të BE-së për refugjatët.
Schinas ka thënë se presidenti i Komisionit Evropian, Jean-Claude Juncker do t’i shkruajë më vonë Orbanit për t’ia uruar “fitoren e qartë” dhe se ai do diskutojë me të për “çështjet e interesit të përbashkët”.
Edhe kancelarja gjermane, Angela Merkel, e ka përshëndetur fitoren e Orbanit dhe ka bërë thirrje për bashkëpunim pavarësisht dallimeve. /rel/ma.me
