Komisioni Evropian është rezervuar të komentojë iniciativën e kryeministrit Isa Mustafa për pezullimin e kriterit të demarkacionit, për së paku dy vjet.
Kur janë pyetur për kërkesën e shefit të Qeverisë, zyrtarë të Brukselit kanë kujtuar dy kriteret e mbetura-ratifikimin e demarkacionit dhe luftën efikase kundër krimit të organizuar dhe korrupsionit, shkruan Koha Ditore.
Megjithatë, të hënën, kryeministri Isa Mustafa ka nisur vizitën në Bruksel, ku pritet të takohet dhe me komisarin për migracion, çështje të brendshme dhe shtetësi, Dimitris Avramopoulos.
Zëdhënësja e Komisionit Evropian, Tove Ernst, ka thënë për “Kohën Ditore” se Komisioni është plotësisht i vetëdijshëm për rëndësinë e liberalizimit të vizave për popullin e Kosovës, “por nuk komenton mbi iniciativat e mundshme lidhur me përmbushjen e kritereve që kërkohen për liberalizimin e vizave”. (b.an)
