Disa nga përkrahësit e daljes së Britanisë së Madhe nga Bashkimi Europian, janë penduar për votën e tyre. Ata janë shprehur se janë “gënjyer” nga fushata për të lënë BE-në dhe se nuk besonin se vota e tyre mund të vlente.
Sipas mediave ndërkombëtare, disa kanë shprehur shqetësimin e tyre mbi referendumin pasi edhe kryeministri i vendit, David Kameron dha dorëheqjen. Ata janë të shqetësuar edhe për financat.
Udhëheqësi i Partisë për Pavarësinë e Britanisë së Madhe, njëkohësisht nismëtar i Brexit, Nigel Farage, ka pranuar publikisht sot se nuk mund të përmbushë një nga premtimet në të cilën kishte bazuar fushatën e tij.
Gjatë një interviste dhënë në emisionin “Good Morning Britain”, Farage ka thënë se ky vend nuk do të marrë 350 milionë paund në javë, edhe pse partia e tij për muaj të tërë kishte folur se në rast të Brexit, kjo shumë e parave do të përfundojë në mirëqenie dhe shëndetësi.
“Unë thjesht nuk mund ta garantoj këtë”, u shpreh Farage, duke u gjendur përballë kundërpërgjigjes së gazetares e cila i tha “se mbi këtë premtim sigurore miliona vota që nxorën vendin nga BE”.
Një grua që ka votuar për daljen e Britanisë nga BE-ja është shprehur: “Nëse do të kisha një mundësi të dytë për të votuar, do të hidhja votën time për qëndrimin në Bashkimin Europian”.
Duke folur në aeroportin e Mançesterit, gruaja e identifikuar vetëm si Mandy shtoi se “realiteti” tani ka goditur shtëpinë. “Jam e mërzitur nga rezultati edhe pse votova për daljen. Kur u zgjova sot në mëngjes, realiteti më goditi mua. Nëse do të kisha mundësi të votoja edhe një herë, do të votoja që të qëndronim në BE”, tha ajo për ITV-në.
Një votues tjetër pro daljes së Britanisë nga Bashkimi Europian është shprehur se ka votuar për largimin nga BE-ja vetëm se mendonte se vota e tij nuk do kishte shumë rëndësi. “Jam paksa i shokuar, nuk e dija se kjo do të ndodhte. Nuk mendoja se vota ime do të vlente pasi mendoja se do të qëndronim në BE”, ka thënë ai për BBC-në.
“U mashtrova kur thanë se lekët që paguajmë në Europë do të shkojnë për NHS-në, por këtë mëngjes realiteti është ndryshe. Pse të gënjesh duke marrë votën, e pastaj të thuash kjo nuk do të ndodhë. Tani ndihem keq për votën time”, është shprehur një tjetër votuese pro daljes së Britanisë nga Bashkimi Europian./a.m.
