Britania e Madhe ka thirrur për sqarime të ngarkuarin me punë të Serbisë në Londër, për të dënuar përfshirjen e zyrtarëve serbë në ceremoninë mortore të ish-komandantit serb të Bosnjës, Ratko Mlladiç.
Mlladiç, i njohur si “Kasapi i Bosnjës”, vdiq në fund të gushtit në Hagë, ku po vuante një dënim të përjetshëm për gjenocid, krime lufte dhe krime kundër njerëzimit. Funeralet e tij u zhvilluan të hënën në Beograd, ku morën pjesë mijëra njerëz.
I dërguari i posaçëm britanik për Ballkanin Perëndimor, Dame Karen Pierce, thirri përfaqësuesin diplomatik serb për të shprehur kundërshtimin e Londrës ndaj pjesëmarrjes së zyrtarëve shtetërorë dhe ushtarakë serbë në ceremoninë mortore.
Ministri britanik për Evropën, Lord Wood of Anfield, tha se glorifikimi i një krimineli lufte të dënuar dëmton besimin, nxit ndarjet dhe bie ndesh me procesin e pajtimit në Bosnjë dhe Hercegovinë dhe në rajon. Ai shtoi se mendimet e qeverisë britanike janë me viktimat e Mlladiçit dhe familjet e tyre, duke theksuar se ato meritojnë respekt, dhembshuri dhe drejtësi, jo përpjekje për të ndryshuar historinë.
Edhe Bashkimi Evropian ka reaguar ndaj ceremonisë. Presidentja e Komisionit Evropian, Ursula von der Leyen, i cilësoi pamjet nga funerali si “tronditëse” dhe tha se prania e disa zyrtarëve të lartë serbë tregon një dështim për t’u përballur me një kapitull të errët të historisë së Evropës. Sipas saj, kjo mund të dëmtojë përpjekjet e Serbisë për t’u anëtarësuar në BE.
Mlladiç vazhdon të nderohet nga një pjesë e serbëve në Serbi dhe në Republikën Srpska të Bosnjës, pavarësisht dënimit të tij për rolin në masakrën e Srebrenicës në vitin 1995 dhe rrethimin e Sarajevës.
Funerali shkaktoi reagime edhe në Bosnjë dhe Hercegovinë. Ministri i Jashtëm boshnjak, Elmedin Konakoviç, njoftoi dëbimin e dy diplomatëve serbë nga vendi. Ata janë atasheu ushtarak Milan Dulanoviç dhe këshilltari për inteligjencën Danko Maksimoviç, të cilëve iu dha afat 48 orë për t’u larguar nga Bosnja dhe Hercegovina.
