Qeveria e Britanisë së Madhe e kishte parë pushtimin e Kuvajtit nga Irakut në vitin 1990 si një mundësi të pashembullt për t’iu shitur armë shteteve të Gjirit, sipas disa dokumenteve sekrete të publikuara së fundmi. Dokumentet, e publikuara nga National Archives, zbulojnë se si para shpërthimit të luftës së Gjirit në vitin 1990, ministrat dhe shërbyesit civilë kishin bërë përpjekje të mëdha për t’u siguruar se prodhuesit britanikë të armëve do ta shfrytëzonin rritjen e pritur të kërkesave për mjete dhe pajisje ushtarake, transmeton Express.
Dokumentet përfshijnë informime sekrete nga Alan Clark, ministër i atëhershëm i Mbrojtjes, për kryeministren Margaret Thatcher, teksa i kishte vizituar shtetet e Gjirit në prag të luftës. Lufta ishte një nxitës i jashtëzakonshëm për shitjen e armëve në rajon dhe ndihmoi në formimin e një marrëdhënie të fortë që vazhdon sot e kësaj dite.
Në një letër sekrete, të shkruar më 19 gusht 1990, pak ditë pasi forcat e Saddam Hussein e kishin pushtuar Kuvajtin, Clark ia shkroi një memo private Thatcherit, në të cilën ai e përshkroi kundërpërgjigjen e pritur nga SHBA-ja dhe aleatët e saj si “mundësi e pashembullt” për Organizatën e Mbrojtjes për Shërbime të Eksportit (DESO).
Clark shpjegoi: “Çfarëdo politikash zhvillimore që aplikojmë, duhet të nënvizoj se kjo është një mundësi e pashembullt për DESO.”
Kah fundi i memos, Clark shton: “E kam përpiluar një listë me prospektet aktuale të shitjeve në fillim të krizës. Nëse e kryejmë punën tonë, atëherë ka shumë mundësi që këto të cohën përpara dhe të rriten në vëllim.”
Ndërkohë, raporti i fundit vjetor i Organizatës së Sigurisë dhe Mbrojtjes i Qeverisë britanike tregon se Britania e Madhe fitoi 6 miliardë funte nga marrëveshjet për armët në vitin 2016, që përbën 9% të tregut botëror të armëve. Ndërsa gjysma e vlerës së përgjithshme ishte fituar nga shitja e armëve në Lindje të Mesme.
Sa i përket 10 viteve të fundit, raporti e radhit Britaninë si shitësin e dytë më të madh botëror të armëve pas SHBA-së.
