Kryeministri britanik Keir Starmer ka deklaruar se është i vendosur të mbyllë hotelet që përdoren për strehimin e azilkërkuesve, duke fajësuar qeverinë e mëparshme për “një rrëmujë gjigante” në sistemin e emigracionit.
Në qytetin Epping, ku qytetarët kanë protestuar kundër përdorimit të hoteleve për azilkërkues, tensionet mbeten të larta. Pankarta të tilla si “Mbroni vajzat tona” dhe “Epping thotë Jo” pasqyrojnë ndarjet e thella që ka shkaktuar kjo çështje në komunitetet lokale.
Starmer tha se qeveria e tij po përshpejton ndjeshëm procesimin e kërkesave për azil, ndërsa njerëzit pa të drejtë qëndrimi po deportohen me ritmin më të lartë.
“Qeveria ka trashëguar një situatë të vështirë në të gjitha departamentet, përfshirë Ministrinë e Brendshme. Pas periudhës së qeverisë së mëparshme, ku kërkesat për azil nuk u trajtuan në kohë, ata u strehuan në hotele, duke bërë që numri i hoteleve për azilkërkues të arrinte në 400. Aktualisht janë rreth 200, dhe plani është që të mbyllen të gjitha, me shqyrtimin e kërkesave që po bëhet më shpejt”, tha Starmer.
Sipas një raporti të publikuar nga rivalët e Starmer, kostot e akomodimit të azilkërkuesve janë trefishuar, ndërsa Departamenti i Brendshëm britanik ka dështuar të përballojë fluksin e madh të kërkesave, raportojnë mediat lokale.
Duke folur nga Turqia, Starmer tha se pastrimi i “rrëmujës” së trashëguar do të jetë një proces i gjatë, por i domosdoshëm për të rivendosur besimin në sistemin britanik të azilit.
Goditja e emigracionit të paligjshëm është thelbësore për kryeministrin Starmer. Britania ka ndërmarrë politika të ashpra që ndalojnë hyrjet e paligjshme në Mbretërinë e Bashkuar.
