Kryeministri i ri britanik Andy Burnham ka miratuar përdorimin e bazave ushtarake britanike nga Shtetet e Bashkuara për atë që Mbretëria e Bashkuar i quan sulme mbrojtëse kundër Iranit.
Mediat ndërkombëtare raportojnë se ishte fillimisht kryeministri i sapo larguar, Keir Starmer, i cili drejtoi një takim të ministrave dhe zyrtarëve të lartë javën e kaluar për të diskutuar politikën britanike pas rifillimit të operacioneve amerikane në fillim të këtij muaji.
Ministrat në atë takim vendosën të vazhdojnë politikën ekzistuese që bazat në Diego Garcia në Oqeanin Indian dhe baza Fairford në Angli, mund të përdoren nga aeroplanët amerikanë që fluturojnë në misione që synojnë mbrojtjen nga kërcënimi raketor iranian.
Burnham u informua për diskutimin dhe u pajtua me vendimin e marrë. Ai do të vazhdojë politikën e qeverisë së mëparshme kur bëhet fjalë për përdorimin e bazave të Mbretërisë së Bashkuar për të ashtuquajturat sulme mbrojtëse të SHBA.
Kjo do të thotë që bazat britanike ka të ngjarë të përdoren për disa nga raundet aktuale të operacioneve amerikane.
Burnham ka të ngjarë të përballet me kritika nga Partia e Gjelbër e krahut të majtë dhe Demokratët Liberalë, të cilët të dy kundërshtojnë përdorimin e bazave sepse, sipas tyre, kjo e bën Mbretërinë e Bashkuar bashkëfajtore në krime lufte.
Burnham foli me Trump në telefon sapo mori detyrën dhe konfirmoi angazhimin e Mbretërisë së Bashkuar për të siguruar lëvizjen e anijeve në Ngushticën e Hormuzit.
Presidenti Trump e cilësoi bisedën pozitive dhe tha se pjesë e diskutimit ishte edhe aleanca ushtarake mes dy vendeve.
Një vend tjetër europian që planifikon të lejojë Shtetet e bashkuara të përdorin bazat e veta ajrore për operacione ushtarake ndaj Iranit, është Bullgaria, një anëtare e NATO dhe Bashkimit Europian.
Qeveria bullgare ka thënë se do të kërkojë miratimin parlamentar për të vendosur deri në tetë avionë cisternë amerikanë në një bazë ajrore.
Teherani reagoi për këtë vendim, duke paralajmëruar se çdo aktivitet që lehtëson sulmet e SHBA ndaj Iranit do të përbënte bashkëpunim në atë që ai e përshkroi si “agresion dhe krime lufte”.
Zëdhënësi i ministrisë së jashtme iraniane e paralajmëroi Bullgarinë të mos bëhet bashkëpunëtore me agresorët.
