Endrit Braimllari, kandidati i Partisë Socialiste për Tiranën për zgjedhjet e 11 majit, foli sot në studion e News 24 për fushatën elektorale të PS-së, ambiciet e tij dhe këndvështrimin që ai ka për zgjedhjet parlamentare.
Braimllari foli gjithashtu edhe për vendimin e tij për t’u larguar nga Partia e Lirisë dhe për t’u bashkuar me Partinë Socialiste.
Ai tha se ndihet i vlerësuar që është pjesë e garës së PS për Tiranën.
Sipas tij nuk ka rëndësi emri apo qenia në listë të hapur apo jo.
“Rëndësi për mua ka ekipi”, theksoi si.
“Ndihem i vlerësuar që jam pjesë e garës së PS për Tiranën. PS ka dhënë sinjale gjithëpërfshirjeje dhe hapje. Nuk ka rëndësi emri apo qenia në listë të hapur apo jo, rëndësi për mua ka ekipi. 19 vite angazhim në politikë, e kam nisur si anëtar i thjeshtë deri në role drejtuese dhe e di që një person që do të angazhohet, ka 2 elemente, pra kontributi dhe mundësia që të jepet. PS më dha një mundësi të përfshihem dhe tani më takon mua të jap angazhimin tim”, tha Braimllari.
Me tej ai u shpreh se PS po shkon në këto zgjedhje me një program të mirëfilltë të integrimit të Shqipërisë në BE.
“PS është një makineri elektorale, një parti shumë e organizuar, që ka disiplinë dhe luan për fitoren e radhës. Fitorja e 11 majit për mua ka një simbolikë tjetër. Pra bëhet për të ndarë Shqipërinë nga politika e vjetër e baltës dhe alternativën e dërgimit të vendit përpara në BE”, tha ai.
Gjithashtu Braimllari tregoi arsyen se pse u largua nga PL.
“Kam më shumë se një vit që nuk angazhohesha në PL. Zgjodha të pozicionohem në mbështetje të PS, e kam vendosur shumë më parë se të isha pjesë e ekipit të PS, dhe u bashkova pikërisht për hapjen e partisë, gjithpërfshirjen, që pasionin tim politik ta ushtroj aty. Unë politikën e kam pasion dhe nuk mund të më ndalte askush. Kanë tentuar ta bëjnë por isha i vendosur në rrugën që do të ndiqja”, tha ai.
