Shpesh herë jemi njohur me histori ku nëna të reja braktisin fëmijët dhe largohen në drejtim të paditur për motive nga më të ndryshmet. Një histori i ngjashme është ajo me protagoniste një nënë fare të re, vetëm 18-vjeçare. Shtetasja me inicialet A.D., e cila ëhstë bërë nënë në moshën e adoleshencës, braktisi foshnjën e saj dhe u largua nga banesa. Familjarët e kërkuan të renë tek të afërmit por më kot raporton JavaNews. Por, pas kërkimeve pa rezultat, ata vendosën t’i drejtohen policisë e cila brenda 24 orësh ka mundur të lokalizojë të renë.
Mësohet se e reja u ndalua në portin e Durrësit, në tentativë për t’u larguar drejt Italisë. Ajo më pas i’u dorëzua forcave të komisariatit nr. 3 Tiranë. Pasi e kanë shoqëruar, e kanë marrë në pyetje për motivet e largimit. Mësohet se 18-vjeçarja ka deklaruar se ka ikur me dëshirë nga banesa, duke braktisur foshnjën.
Po ashtu, ajo ka deklaruar se është shumë e re për të rritur fëmijën dhe do të bëjë jetën e saj. Sipas të dhënave, bëhet me dije se e reja ka pasur lidhje me një person. Në momentin e ndalimit ajo ishte e vetme, por dyshohet se e reja do të largohej bashkë me të.
Hetuesit po kryejnë verifikimet për të vërtetuar rolin e këtij personi në largimin e nënës së re nga banesa. Ajo ka konsumuar veprën penale ‘‘Braktisja e fëmijëve të mitur“ dhe do të gjykohet për këtë akuzë. Pas kryerjes së verifikimeve shtesë pritet të vendoset nëse do ngarkohet me përgjegjësi edhe partneri i ri i nënës 18-vjeçare./JavaNews/a.m.
