Kryetari i Komisioni të Ekonomisë dhe Financave Erion Braçe i ka kërkuar sot Komisionit të Prokurimit Publik të vendosë si prioritet në çdo vendim që jep interesin publik dhe jo atë të operatorëve ekonomik.
“Më rezulton se ju jeni kufizuar tek një detyrë formale, të viheni në lëvizje nga disa ankesa të operatorëve ekonomik. Që prej vitit 1992 kur ka hyrë kjo formë e përdorimit të parasë publike perceptimi është se është një proces i korruptuar në favor të një grushti operatorësh ekonomik edhe pse duhet pranuar se ka përmirësime të dukshme në ligjshmëri e transparencë, qoftë edhe në atë q është thelbi për të marrë cilësinë maksimale me çmimin e vlerën më të mirë, jo më të lirë”, deklaroi Braçe gjatë diskutimit të raportit për vitin 2017 të KPP-së në Komision.
Sipas Braçes, me gjithë përmirësimet e dukshme paralelisht është thelluar perceptimi se operatorët ekonomik kanë gjetur të gjithë instrumentet për të deformuar procesin.
“Kjo vjen sepse interesi publik nuk është në thelb të këtij procesi. Ndërkohë ne duam që në këtë sistem interesi publik të përputhet me rezultatin final të prokurimit publik për të marrë një shërbim publik cilëso për qytetarët që paguajnë taksa në buxhetin e shtetit”, tha më tej ai.
Roli juaj, iu drejtuar ai Kryetares së Komisionit të Prokurimit Publik, është të ktheni ligjshmërinë në të gjitha proceset me shqyrtimin me transparencë, në kohë dhe të pavarur nga interesat e një operatori që është ankuar te ju të ]do ankese.
“Kërkojmë unifikimin e praktikës suaj për të gjitha hallkat, duke nisur nga APP që është institucion që kontrollohet nga ju. Rekomandime të qarta për të gjithë vargun e institucioneve të përfshira në prokurimin publik. Janë një sërë rastesh që deformojnë konkurrencën në treg për shkak të vendimmarrjes që buron nga këto institucione. Konkretisht duke nisur nga koncesioni i skanimit në dogana”, deklaroi Braçe.
Gjatë periudhës 1 janar 2017 – 31 dhjetor 2017, në raportit e KPP-së thuhet se janë regjistruar 1 099 ankesa në total, prej të cilave 1 083 ankesa janë paraqitur për procedurat e prokurimit publik, 4 ankesa për procedurat konkurruese koncesione/ppp, 7 ankesa për procedurat e ankandit publik dhe 5 ankesa për procedurat konkurruese leje minerare.
