Këshilltarja e djathtë e Këshillit Bashkiak të Tiranës, Reila Bozdo shprehet se mosmbledhja e këshillit rrezikon të mos miratohen fondet për familjet në nevojë. Sipas Bozdos, Këshilli nuk u mblodh edhe këtë javë për buxhetin 2016, duke rrezikuar seriozisht miratimin e fondit për këto familje.
Deklarata e Bozdos
“Javën e kaluar denoncova që Këshilli Bashkiak nuk është mbledhur për diskutimin e buxhetit 2016. Këshilli Bashkiak nuk u mblodh as këtë javë, megjithëse për cështje të tjera, muajt e kaluar jemi mbledhur më shpesh. Kanë mbetur fare pak ditë nga mbyllja e vitit.
Në Këshillin Bashkiak ne miratojmë cdo muaj me procedurë rutinore, ndihmën ekonomike për familje në nevojë. Këtë muaj Këshilli nuk u mblodh. Dmth që fondi i përmuajshëm për këto familje të varfëra nuk është shpërndarë”.
Reila Bozdo shpreson që stafi i Bashkisë të gjejë ndonjë modalitet tjetër që të ndihmojë familjet të marrin paratë, e këto të fundit të kenë mundësi të blenë diçka për festat e fundvitit.
Shpresoj shumë që stafi i bashkisë të ketë gjetur një modalitet të rregullt për tua dhënë paratë brenda muajit familjeve që presin ti kenë ato para e të festojnë me dicka të vogël pa marrë lekë borxh diku. Nëse kjo nuk ka ndodhur, në këtë prag Krishtlindje, i lutem Zotit ti falë se nuk dinë se cfarë bëjnë”.
