Bookmakers-at ndërkombëtare kanë publikuar kuotat e para për fituesin e Botërorit 2026.
Sipas vlerësimeve të DraftKings Sportsbook, Spanja dhe Franca konsiderohen dy favoritët kryesorë për të ngritur Kupën e Botës, me diferenca minimale mes tyre.
Kampionët e Evropës, Spanja, kryesojnë listën me kuotën 4,50, ndërsa Franca ndjek menjëherë pas me 4,75. Skuadra e Luis de la Fuente pritet të mbështetet te brezi i ri i artë i udhëhequr nga sensacioni Lamine Yamal, i cili konsiderohet një nga kandidatët kryesorë për çmimin e lojtarit më të mirë të turneut.
Nga ana tjetër, Franca vjen pas dy finaleve radhazi në Kupën e Botës. “Gjelat” fituan trofeun në vitin 2018 dhe arritën finalen edhe në Katar 2022, ku u mposhtën nga Argjentina e Lionel Messit. Për trajnerin Didier Deschamps, ky do të jetë Botërori i tretë si trajner i Francës.
Anglia renditet menjëherë pas dy favoritëve kryesorë me kuotën 5,50. “Tre Luanët” ende presin trofeun e parë madhor që nga viti 1966, por me Thomas Tuchel në stol dhe një skuadër të mbushur me yje, pritshmëritë janë të larta. Kapiteni Harry Kane konsiderohet favoriti kryesor për çmimin e lojtarit më të mirë të turneut.
Ndërkohë, Portugalia po fiton gjithnjë e më shumë mbështetje nga ekspertët dhe tifozët. Kuota e luzitanëve është përmirësuar ndjeshëm gjatë javëve të fundit dhe shumë e shohin skuadrën si një kandidat serioz për trofeun në atë që mund të jetë Botërori i fundit i Cristiano Ronaldos.
Brazili dhe Argjentina mbeten gjithashtu mes pretendentëve kryesorë. Argjentinasit do të mbrojnë titullin e fituar në Katar 2022, ndërsa Brazili synon t’i japë fund pritjes që prej vitit 2002 për trofeun e gjashtë botëror.
Pas favoritëve tradicionalë vjen Gjermania, e cila pavarësisht historisë së pasur, ka zhgënjyer në dy Botërorët e fundit duke u eliminuar që në fazën e grupeve.
Në kategorinë e “kuajve të errët” spikat Norvegjia. Për herë të parë që nga viti 1998, norvegjezët janë kualifikuar në Kupën e Botës dhe mbështeten te superylli Erling Haaland, si dhe talentet Oscar Bobb dhe Antonio Nusa.
Gjithashtu, Japonia po tërheq vëmendje të madhe në tregun e basteve. Kuotat e saj janë përgjysmuar gjatë muajve të fundit, duke treguar rritjen e besimit te potenciali i skuadrës aziatike.
Ndërsa Shtetet e Bashkuara, një nga vendet organizatore, do të luajnë me kuotat më të mira në historinë e tyre në një Kupë Bote, por ende konsiderohen jashtë grupit të favoritëve kryesorë.
