Një kërcënim që mund të rrezikojë dhe nisjen e një lufte botërore ka ardhur nga Rusia. Pasi Lituania bllokoi një anije ruse e cila po transportonte mallra që ishin bllokuar nga Perëndimi për shkak të sanksioneve, Moska reagoi duke thënë se nëse mallrat nuk lejoheshin të mbërrinin në territorin rus sa më shpejt, Rusisë i lindte e drejta për të sulmuar me qëllim mbrojtjen e interesave të saj.
Nëse Rusia do të sulmonte Lituaninë, atëherë të gjitha vendet e NATO-s do ishin të përfshira direkt në luftë për shkak të ligjit të aleancës që i detyron.
Ministria e Jashtme ruse tha: “Ne i konsiderojmë këto si masa provokuese të palës lituaneze që shkelin detyrimet ligjore ndërkombëtare të Lituanisë, kryesisht Deklaratën e Përbashkët të Federatës Ruse dhe Bashkimit Evropian të vitit 2002 mbi tranzitin midis rajonit të Kaliningradit dhe pjesës tjetër të Federatës Ruse. Jini të përgatitur për përgjigje armiqësore”.
Senatori besnik Andrey Klimov paralajmëroi se ishte “agresion i drejtpërdrejtë kundër Rusisë, fjalë për fjalë duke na detyruar që menjëherë t’i drejtohemi vetëmbrojtjes së duhur”.
Nga ana tjetër ministri i Jashtëm lituanez Gabrielius Landsbergis nuk u tërhoq nga vendimi i tij, teksa tha se vendi i tij thjesht po zbatonte sanksionet e vendosura nga BE. Ai tha se masat e zbatuara janë marrë pas ‘konsultimit me Komisionin Evropian dhe sipas udhëzimeve të tij.
“Mallrat e sanksionuara nuk do të lejohen më të kalojnë tranzit në territorin e Lituanisë,” shtoi Landsbergis. Ministria e Jashtme theksoi se nuk ka vendosur kufizime ‘të njëanshme, individuale ose shtesë’.
/e.d
