Sarajevë- Dy ushtarë të forcave të armatosura në Bosnjë janë vrarë mbrëmjen e së mërkurës nga një person i armatosur me automatik. Autori më pas ka hapur zjarr ndaj një autobuzi të transportit publik, duke plagosur dy civilë dhe një ushtarak tjetër.
Sipas një medie lokale, televizionit N1, personi përpara se të qëllonte ka bërtitur “Allahu Akbar”, duke hedhur dyshime serioze se bëhet fjalë për një sulm terrorist.
Sipas edicionit online të së përditshmes “Dnevni Avaz”, personi ka vrarë më pas veten. Menjëherë janë mbledhur në një takim urgjent krerët e qeverisë dhe përgjegjësit e forcave të sigurisë.
Forcat e armatosura janë vendosur në gjendje gatishmërie, ndërsa janë rritur masat e sigurisë në të gjitha komplekset ushtarake.
