Xheko paralajmëron grekët. Futbollistët e Bosnjë-Hercegovinës janë ndarë të pakënaqur që kanë humbur dy pikë nga udhëtimi në Greqi në çastet e fundit të ndeshjes të së dielës mbrëma.
Greqia shënoi golin e barazimit në minutën e 95-të duke barazuar në 1:1. Por, më të pakënaqur ata kanë qenë me mënyrën se si janë pritur në Greqi. Në tribuna në stadium ishte parë një pankartë “Thikë! Tel! Srebrenica”, e shkruar në gjuhën serbe, duke iu referuar masakrës së Srebrenicës, përcjell Koha Ditore.
Veç presionit nga tribunat, sjellja nuk ishte e mirë as në fushë. Pati një zënkë mes lojtarëve, pas së cilës u larguan me karton të kuq ylli i Bosnjë-Hercegovinës, Edin Xheko, dhe futbollisti grek Kyriakos Papadopoulos. Veç dy kartonëve të kuq pati edhe dhjetë të verdhë, gjashtë për boshnjakët dhe katër për grekët.
“Ndiej sikur kemi humbur 3:0. Grekët nuk e kanë merituar, jo një pikë, por është dashur të humbasin 4:0. Nuk ka rëndësi, shkojmë tutje, i falënderojmë për mikpritjen e keqe. Mezi po i pres në Zenicë”, ka thënë Xheko, përcjellin mediumet boshnjake… (b.an)
