Bashkimi Europian duhet të marrë në konsideratë ngrirjen e rezervave të Rusisë në valutë të huaj dhe të përdorë këto para për rindërtimin e Ukrainës pas përfundimit të luftës. Kështu deklaroi shefi i politikës së jashtme të Bashkimit Europian, Josep Borrell, në një intervistë për “Financial Times”.
“Komisioni Europian ka thënë se çmimi i rindërtimit mund të arrijë në qindra-miliarda Dollarë dhe kryeqendrat e BE-së duhet ta shqyrtojnë mundësinë e sekuestrimit të rezervave të ngrira të valutës ruse për të ndihmuar në financimin e rindërtimit në Ukrainës pas luftës”.
Borell theksoi se një lëvizje e tillë do të ishte e ngjashme me atë të Uashingtonit, kur përdori asetet e ngrira të Bankës Qendrore afgane, pas kthimit të talibanëve në pushtet, për të ndihmuar Afganistanin e shkatërruar nga lufta.
“Ne i kemi paratë në xhepat tona dhe dikush duhet të më shpjegojë pse një vendim i tillë mund të vlejë për paratë afgane dhe jo për ato ruse”.
Kryediplomati europian nëvizoi se një vendim i tillë mund të jetë një nga mënyrat përmes së cilave Rusia mund të detyrohet që të paguajë “dëmshpërblimet e luftës” për sulmin kundër Ukrainës.
“Kjo është një nga pyetjet më të rëndësishme politike që aktualisht është në tavolinë: kush do të paguajë për rindërtimin e Ukrainës?”
Deri më tani vendet perëndimore kanë ngrirë 300 miliardë Dollarë në valutë të huaj nga rezervat e Rusisë, si kundërpërgjigje për luftën në Ukrainë.
/a.r
