Shqipëria ka nisur konkretizimin e angazhimit të saj në misionin ndërkombëtar për ruajtjen e paqes në Gaza, duke ndërmarrë hapat e parë për dislokimin e personelit ushtarak.
Ministri i Mbrojtjes, Ermal Nufi bëri të ditur pas mbledhjes së qeverise se në fazën e parë janë caktuar katër oficerë, të cilët do të vendosen pranë strukturave të Shtabit të misionit.
Sipas burimeve të A2 CNN, pas raportimit dhe vlerësimit të situatës në terren, do të merret vendimi për dërgimin e 36 ushtarakëve të tjerë, duke e çuar në 40 numrin total të ushtarakëve shqiptarë të planifikuar për këtë mision. Faza e dytë e dislokimit do të shoqërohet edhe me përcaktimin e zonave ku do të angazhohen trupat shqiptare.
Ky mision përbën kontributin e Shqipërisë në përpjekjet ndërkombëtare për ruajtjen e paqes dhe stabilizimin e situatës në Rripin e Gazës nëpërmjet Bordit të Paqes të themeluar nga Presidenti i SHBA Donald Trump.
