Deputeti i Partisë Demokratike, Agron Shehaj ka komentuar bonusin e bebeve të dhënë nga kreu i qeverisë Edi Rama.
Në një postim në Facebook, ai shprehet se bonusi i qeverisë për bebet e lindura nuk është zgjidhja, pasi sipas deputetit “shqiptarët duan mundësi për fëmijët e tyre dhe se çdo fëmijë që vjen në jetë sot në Shqipëri e pret një borxh gati 3500 euro nga huatë dhe koncesionet e qeverisë”.
“Çdo fëmijë që vjen në jetë sot në Shqipëri e pret një borxh gati 3500 euro nga huatë dhe koncesionet e qeverisë, e pret një arsim mediokër dhe një shëndetësi që lëngon, ndërkohë që kur të rritet ka të garantuar vetëm mungesën e mundësive dhe papunësinë”, shprehet Shehaj.
Shehaj shkruan se kjo gjendje nuk mund të vazhdojë më dhe se duhet që këtë vit të nisim e të punojmë sipas tij për fëmijët tanë.
“Kjo gjendje nuk mund të vazhdojë më. Ndaj këtë vit duhet të punojmë të gjithë bashkë për të ndryshuar gjendjen për fëmijët tanë. 2019 duhet të jetë hapi i parë për një të ardhme më të mirë dhe të sigurt për fëmijët tanë”, shprehet Shehaj.
/a.rada
