Deputetit socialist Ben Blushi kritikoi sërish qeverinë në Kuvendin e Shqipërisë për gjendjen e varfërisë në vend dhe mungesën e modestisë. Blushi tha se problemi i qeverisë nuk është mungesa e parave, por mungesa e ideve dhe e modestisë. Duke thënë se është një nga anëtarët e shumicës parlamentare, Blushi ngriti pikëpytje për ndryshimet që ka sjellë qeveria në rreth dy vitet e qeverisjes së saj.
Deputeti socialist Ben Blushi sërish ka kritikuar qeverinë e majtë duke thënë se ajo i ka tradhëtuar të varfërit që jetojnë në Shqipëri. Sipas Blushit kabineti qeveritar përfaqëson modelin e një qeverie aspak modeste, që në vend që të luftojë varfërinë, sulmon personat që thonë se varfëria është shtuar. Blushi theksoi se në bindjen e tij nuk është mungesa e parave, por mungesa e ideve dhe modestisë.
“Nuk hezitoj aspak të them se kjo shumica jonë i ka tradhtuar të varfërit. Ajo nuk është modeste dhe kur nuk je modest e ke të vështirë të përfaqësosh ata që jetojnë keq. Edhe kostoja e mungesës së modestisë është kostoja më e lartë sot për mendimin tim. Edhe sot në këtë parlament për fat të keq, nuk u fol kundër varfërisë, por ndaj atyre që thonë se varfëria është shtuar. Edhe unë jam njëri prej tyre. Unë nuk jam opozitar, unë jam nga ata që mendojnë se Shqipëria nuk po shkon në drejtimin e duhur për shkak se pesimizmi në Shqipëri po shtohet, varfëria po rritet, pabarazia po rritet, rinia po plaket nga papunësia dhe pleqëria po torturohet nga padrejtësia. Edhe unë them që nuk janë paratë që i mungojnë kësaj qeverie. Kësaj i mungojnë edhe dy gjëra që janë më të vyera se paratë në vetvete. E para janë idetë dhe e dyta është modestia. Të dyja bashkë, modestia dhe idetë kanë më shumë vlerë dhe janë më të shtrenjta se sa paratë.” Tha Blushi.
Pas përfundimit të fjalës së deputetit socialist, ka reaguar kreu i grupit parlamentar të PD, Edi Paloka i cili i ka bërë thirrje kreut të kuvendit Meta që të respektohet rregullorja e kuvendit, në lidhje me rradhën e folësve në sallë. Paloka tha se prej orësh sallën e kanë dominuar përfaqësuesit e mazhorancës apo replikat mes tyre. Duke shpotitur Ministrin e ekonomisë, i cili kërkoi fjalën për replikë ndaj Blushit, Paloka tha se duan apo s’duan të majtët, Blushi është i tyri dhe se PD nuk ka ndërmend ta marrë në krahun e saj.
“Nuk e kam për replikë fare me blushin. Nuk ka shkëlqejnë fare sytë kur flet blushi. Se u ftillua dhe ai gjë e mirë është. Kemi filluar seancën dhe flet vetëm mazhoranca. Tani filloi dhe ky avazi, që ka replika mes të majtës, se kanë këta replika mes tyre. Blushin e keni doni apo s’doni, ne nuk kemi ndërmend të marrim Blushin në krahun tonë. Ndaj dhe zoti kryetar, të lutem të respektohet rregullorja.”- tha Paloka.
