Sekretari amerikan i Shtetit Anthony Blinken tha se SHBA po zhvendos kompleksin e saj të ambasadës në aeroportin e Kabulit.
“Kjo është arsyeja pse ne kishim forca në dorë për t’u siguruar që mund ta bënim këtë në një mënyrë të sigurt dhe të rregullt. Vetë kompleksi, njerëzit po largohen atje dhe po shkojnë në aeroport,” tha Blinken për mediat e huaja.
Ai shtoi se ambasada ka lista të njerëzve për të dalë nga rreziku dhe po dyfishon përpjekjet për ta bërë këtë.
Ai gjithashtu mohoi çdo krahasim të situatës aktuale me rënien e Saigon në vitin 1975, në Vietnam, dhe këmbëngul se misioni afgan kishte qenë i suksesshëm “Ky nuk është Saigon,”
“Puna është që: ne shkuam në Afganistan 20 vjet më parë me një mision në mendje. Kjo ishte që të merreshim me njerëzit që na sulmuan ne më 11 shtator. Ai mision ka qenë i suksesshëm”, tha Blinken.
Estonia dhe Norvegjia kanë kërkuar që 15 anëtarët e Këshillit të Sigurimit të OKB-së të takohen për Afganistanin sa më shpejt që të jetë e mundur.
Ndërkaq, zyrtari i Ministrisë së Jashtme ruse, Zamir Kabulov tha më 15 gusht se Moska po “punon” me të tjerë për të caktuar mbajtjen e një mbledhjeje urgjente.
Rusia është një prej pesë anëtarëve të përhershme të këtij këshilli së bashku me SHBA-në, Britaninë, Francën dhe Kinën.
Kryeministri britanik, Boris Johson tha se po zhvillon bisedime për krizën në Afganistan dhe ai kërkoi nga Parlamenti britanik që të kthehej nga pushimi i verës dhe të takohej.
Më 13 gusht, Johnson ishte zotuar se Britania nuk do “t’ia kthejë shpinën” Afganistanit, edhe pse ai ka konfirmuar se personeli i ambasadës është evakuuar për shkak të frikës nga talibanët.
NATO-ja tha se po “ndihmon në mbajtjen e operacioneve në aeroportin e Kabulit, që afganët të kenë kontakt me botën”.
Një zyrtar i NATO-s tha se zgjidhja politike për konfliktin “tani është më urgjente se kurrë më parë”.
Më 15 gusht, tabilanët kanë hyrë në Kabul, por janë zotuar se nuk do ta marrin me forcë kontrollin e këtij qyteti. Ndërkaq, presidenti afgan, Ashraf Ghani është larguar nga vendi dhe raportohet se ka ikur në Taxhikistan.
