Ministri i Ekonomisë, Arben Ahmetaj deklaroi sot në Kuvend se “blerja e eurobondit shqiptar pak ditë më parë në tregjet ndërkombëtare, tregon se investitorët e huaj kanë tashmë besim në ekonominë shqiptare. Sot tregjet ndërkombëtare e financuan me 3.5 % kuponin tonë të eurobondit për 7 vite, jo për 5” .
Në fjalën e tij në Kuvend ku po diskutohet projektligji për investimet e huaja direkte, Ahmetaj u shpreh se “eurobondi ishte test i ekonomisë shqiptare. Tregjet ndërkombëtare pranuan të investojnë. Investimet private kanë ardhur vetëm në rritje, vetëm në 6 muajt e parë kemi 26% rritje të investimeve të huaja. Investimet e huaja kanë kontribuar në rritjen ekonomike të Shqipërisë”.
“Ka ndryshuar tregu i punës. Është ky grup, është ky kryeministër, është kjo ministri që e nisi. Gropën e kemi lënë në distancë mbrapa. Shqipëria nuk është më afër gropës pavarësisht problemeve që kemi. Ajo që ndodhi në tregjet ndërkombëtare pak ditë më parë, çfarë bënë ato? E futën në skaner dhe pranuan të investojnë në sigurinë e Shqipërisë për një periudhë 7-vjeçare. E dini sa larg ishim nga rajoni?”, theksoi Ahmetaj duke shtuar se e dini çdo të thotë për 7 vite.
“Ata investitorë ulen në tryezat dhe me ftohtësi gjykojnë që kjo ekonomi e ka të qartë rrugën, përpara i ka të qarta reformat , sepse reformat bënë të mundur që vendi të ishte i sigurtë për të investuar”, shtoi ai.
Ministri tha se “ka edhe një element tjetër a e dini bazën e investitorëve? Ishin 120 investitorë që morën pjesë në kërkesat për blerjen e eurobondit shqiptar, nga të cilët emrat më të mëdhenj të financave ndërkombëtare si Goldman Sachs, J.P Morgan , Pinko dhe për herë të parë kanë marrë pjesë fonde pensionesh nga Finlanda dhe fondi i pensioneve të shoqërisë së hekurudhuave të Francës”, nënvizoi Ahmetaj.
Duke folur për borxhet, Ahmetaj tha se “ndërkohë që rajoni e ka borxhin, Maqedonia 45%, Mali i Zi 55% të prodhimit të brendshëm bruto, ne e kemi sot 67.5% në rënie dhe përpara disa vitesh jo që nuk na trajtonin njëlloj me rajonin, por na shikonim me dyshim”.
“Përpara disa vitesh jo që nuk na trajtonin njëlloj me rajonin, por na shikonim me dyshim , po ta mbani mend në vitin 2010 i doli interesi 7.5% dhe në një moment u tregtua në tregjet ndërkombëtare 13%. Atë ditë ky nuk quhej vend normal , atë ditë ky vend nuk rrinte dot me të dyja këmbët. Atë vit ky vend nuk ishte një vend ku mund të investohej 13%, po kush i paguante, qytetarët do t’i paguanin”, theksoi Ahmetaj.
Nuk është puna, vijoi ai, se kush e bleu bonon tonë puna është çfarë bëmë ne me menaxhimin e fondit , se e kemi detyrë ta bëjmë, puna është që vendi referohet si vend normal dhe po merret si referencë për investitorët e huaj.
Ministri Ahmetaj sqaroi që ligji është një ndryshim logjistik kohorë, sepse ne po përgatisim tani që po flasim së bashku me IFC dhe jo vetëm një ligj integral për investimet e huaja ku do t’i trajtojmë në parim dhe do t’i japim mundësi dhe në detaje trajtimit me transparencë, barazi investimeve të huaja në Shqipëri.
/b.d
