Zep Blatter nuk e paska dhënë kot dorëheqjen. Ish kreu i FIFA-s rezulton zyrtarisht nën hetimin e FBI, sipas mediave të mëdha amerikane. Rrjeti ABC bën të ditur se Blatter ndodhet i hetuar në të njëjtën dosje me atë të shumë zyrtarëve të tjerë të FIFA-s që u publikua disa ditë më parë. Megjithëse Blatter dha dje dorëheqjen me justifikimin e “nevojës për një rinovim të thellë të FIFA-s”, tashmë po merret vesh se ai është detyruar ta bëjë këtë, nga hetimet që po avancojnë në SHBA rreth korrupsionit të organizatës më të madhe të futbollit në botë.
Megjithatë Blatter do të mbetet në detyrë edhe për shumë muaj të tjerë, pasi kongresi i ardhshëm i FIFA do të mbahet në 13 maj të vitit të ardhshëm në Meksiko City. Që do të thotë se kreu i sapozgjedhur i FIFA-s do të vijojë të drejtojë në timonin e organizatës dhe për rreth një vit tjetër. Nëse nuk ka surpriza të tjera rrugës, kuptohet…
