Një incident i rëndë është raportuar paraditen e sotme në një resort në Vlorë, ku një grup prej më shumë se 10 personash, shumica prej tyre dyshohet se kanë qenë të armatosur, kanë shkuar për t’i vendosur gjobë pronarit të hotelit.
Sipas informacioneve paraprake, personat kanë kërcënuar fillimisht pronarin e hotelit Vasil Bedinaj, ndërsa më pas dyshohet se kanë përdorur edhe armët, duke i kërkuar një shumë prej 5 milionë eurosh.
Mes palëve ka pasur edhe përplasje fizike, ndërsa autorët janë larguar me shpejtësi nga ambientet e hotelit pas ngjarjes.
Menjëherë pas njoftimit nga pronari i hotelit, shërbimet e Policisë janë nisur drejt adresës së dhënë, ndërsa janë ngritur edhe pika kontrolli në zona të ndryshme. Në afërsi të Pusit të Mezinit, efektivët kanë konstatuar një automjet që po lëvizte me shpejtësi dhe janë vënë në ndjekje të tij. Gjatë ndjekjes, drejtuesi ka humbur kontrollin dhe automjeti është aksidentuar.
Në makinë janë gjetur tre persona. Dy prej tyre kanë mbetur të dëmtuar si pasojë e aksidentit, ndërsa personi i tretë nuk ka pasur probleme shëndetësore. Gjatë kontrollit të automjetit, Policia ka gjetur dhe sekuestruar një armë zjarri, pistoletë.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon për zbardhjen e plotë të dinamikës së ngjarjes dhe identifikimin e të gjithë personave të përfshirë.
Njoftimi i plotë i Policisë:
“Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të. Menjëherë pas njoftimit, shërbimet e Policisë kanë shkuar në drejtim të adresës së dhënë, si dhe kanë ngritur pika kontrolli. Shërbimet e Policisë, në afërsi të Pusit të Mezinit, kanë konstatuar një automjet që lëvizte me shpejtësi dhe janë vënë në ndjekje të tij.
Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore. Gjatë kontrollit në automjet, shërbimet e Policisë kanë gjetur 1 armë zjarri, pistoletë.
Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë. Shërbimet e Policisë së DVP Vlorë, në bashkëpunim me shërbimet e disa DVP-ve të tjera, po kryejnë kontrolle dhe veprime të tjera, me qëllim identifikimin dhe kapjen e shtetasve të tjerë të përfshirë në këtë ngjarje. Meqenëse veprimet janë dinamike, në përfundim të veprimeve të para hetimore do të ketë një njoftim të plotë për ngjarjen”.
