EKSKLUZIVE JAVANEWS/ Taulant Bino, një ndër ekspertët më të mirë shqiptarë në fushën e mjedisit dhe njohës mjaft i mirë i botës së shpendëve në Shqipëri, hedh dyshime serioze, lidhur me fotografinë e shfaqur disa ditë më parë, në të cilin shfaqet një person që mban në duar një shkabë të vrarë. Në një prononcim të tij për Javanews.al ai shprehet se është e vërtetë që në foto është një “shkabë mjekrroshe”, por dyshimet janë të arësyeshme për vendin dhe kohën kur ajo shkabë është vrarë. Bino bën të ditur se një “shkabë mjekrroshe” e vrarë dhe e ballsamosur gjendet edhe në një lokal në Kukës, dhe është e paqartë nësë bëhet fjalë për të njëjtën shkabë apo për një shkabë tjetër.
“Ajo që shohim në foto është një lloj shkabe të cilën ne mendojmë se është zhdukur rreth viteve 2004- 2007. Vrasja e tyre është pak e vështirë. Por ajo mund të jetë vrarë pasi ka ngrënë kërmë dhe në momentet e para ajo e ka të vështirë të fluturoj. E kam parë disa herë atë foto dhe kam dyshime nëse ajo është një shkabë e vrarë këto muajt e fundit”, thekson Bino.
Sipas tij, shkaba është një shpend i rrezikuar në mjedisin shqiptarë për shumë arësye, të cilat nuk lidhen thjeshtë drejtpërdrejtë vetëm me njeriun, por nga një problematikë komplekse. Bino bën të ditur se shpesh herë barijtë, për të mbrojtur bagëtitë nga ujqërit, vendosin bagëti të ngordhura, të cilave u helmojnë mishin. Ka raste që këto kërma kurth tërheqin edhe shkabën, e cila bie viktimë e përpjekjeve të barinjve për të mbrojtur bagëtit nga tufat e ujqërve.
“Pra në këtë rast nuk është se kemi të bëjmë me një vrasje me dashje të shkabës. Por nga ana tjetër ka edhe gjuetarë, të cilët nuk ngurrojnë t’i vrasin ca për hir të fanatizmit të pasionit të tyre për gjuetinë dhe ndonjë herë edhe për shkak të paditurisë. Kemi një shtim të armatosjes së njerëzve me çifte, të cilët pretendojnë se merren me gjuetinë. Kjo është një praktikë jo pozitive, po të kemi parasysh se disa vende të Eurpës perëndimore, gjithnjë e më shumë po marrin masa për reduktimin e dhënieve të lejeve për gjueti si dhe të shitjes së armëve të gjahut”, shprehet Bino.
Ai informon se Shqipëria shumë vite më parë ka pasur kolonitë e saja të shkabave, të cilat kanë ardhur gjithnjë e duke u rralluar. Sipas tij, në vendin tonë kanë qarkulluar disa lloje shkabash: 1 Shkaba e zezë e cila është zhdukur; 2. Shkaba mjekrroshe; 3. Shkaba kali qyqes.
“Zhdukja e disa shkabave tregon një raport problematik me natyrën. Shkaba “kali qyqes” është pak më e përhapur pasi në Shqipëri mendohet se janë ende 6 çifte riprodhuese. Gjithsesi, kjo panoramë duhet të na ndërgjegjësojë që të jemi shumë të kujdesshëm sidomos në raportin mes shpendëve dhe gjuetis. Moratoriumi për gjuetinë ka anën e saj pozitive, pasi pikë së pari ua bëri të pamundur shumë gjuetarëve Italian të vijnë e të bëjnë gjueti në vendin tonë. Ata vërtetë kanë bërë kërdin. Por nga ana tjetër nëse moratoriumi nuk zbatohet pasojat do të vijojnë të jenë ende të dëmshme”, shprehet Bino.
(javanews.al) Me. Ar
