Një ditë pas vendimit të Këshillit të Bashkisë së Tiranës për rritjen e çmimit të biletës së urbanëve nga 30 në 40 lek ka ardhur edhe reagimi i Shoqatës së Transportit.
Përfaqësues të saj janë shprehur kundër vendimit për rritjen e çmimit me vetëm 10 lekë, pasi ata kanë kërkuar nga bashkia që çmimi të shkojë në 70 lekë.
Gjithsesi, ndryshe nga sa kishin paralajmëruar se do ndërprisnin transportin nëse çmimi nuk bëhet 70 lekë, duket se janë tërhequr nga vendimi drastik.
“Nuk do të ketë bllokim të shërbimit në janar. S’jemi dakord me çmimin 40 lekë të biletës. Nuk është indeksuar aboneja e studentit”, shprehen përfaqësues të Shoqatës së Transportit. Ata lënë të hapur sërish mundësinë për ndryshimin e çmimit, pasi deklarojnë se do të negociojnë me kryetarin Veliaj në 3 muajt e parë të 2016-ës.
