Ministria e Mbrojtjes ka bërë së fundmi bilancin e situatës së zjarreve që prej ditësh kanë përfshirë disa zona të vendit. Sipas ministrisë, gjatë 24 orëve të fundit janë raportuar gjithsej 11 vatra zjarri, 7 prej të cilave janë tashmë nën mbikëqyrje, ndërsa 4 vijojnë të jenë aktive.
Për përballimin e situatës janë angazhuar 332 forca operacionale dhe 15 automjete zjarrfikëse, të mbështetura nga 150 efektivë të Forcave të Armatosura, 3 automjete zjarrfikëse, 1 ekskavator i rëndë, 4 helikopterë dhe 2 avionë “Air Tractor”.
Një nga vatrat kryesore që vijon të jetë aktive është ajo në Gojan-Gjegjan, në Pukë, ku ndërhyrja po kryhet nga toka dhe ajri. Sipas Ministrisë së Mbrojtjes, operacioni ka sjellë përmirësim të ndjeshëm të situatës në Gojan të Madh dhe Gojan të Vogël.
Një tjetër vatër aktive është ajo në Shtanë-Tenë, në Mirditë, ku po vijon puna e forcave zjarrfikëse, strukturave vendore, shërbimit pyjor dhe Forcave të Armatosura.
Ndërhyrja vijon edhe në Malin e Dajtit, ku janë angazhuar 25 efektivë të MZSH-së, 5 forca të ADZM-së dhe 30 efektivë të Forcave të Armatosura, me mbështetjen e një helikopteri dhe dy avionëve “Air Tractor”.
Në Shtuf të Mirditës, zjarri mbetet aktiv, por me intensitet të ulët dhe po monitorohet nga strukturat vendore.
Ndërkohë, në Dukat, zjarri është shuar pas ndërhyrjes së forcave tokësore dhe mbështetjes së Forcave të Armatosura, ndërsa zona vijon të mbahet nën mbikëqyrje. Edhe vatrat e raportuara në Dibër, Lezhë, Elbasan dhe Vlorë janë nën monitorim.
