Kryebashkiaku i Tiranës Erion Veliaj ka bërë një bilanc të punës së Bashkisë, duke thënë se prej një viti tashmë, kryeqytetit i është kthyer një qeveri vendore e cila është në punë me 3 turne. Në bilancin për 1 vit në krye të Bashkisë së Tiranës, Veliaj i ka premtuar qytetarëve se nuk do të jetë e vonë koha, kur punët të arrijnë në çdo qelizë të qytetit. Veliaj tha se investimet për rregullimin e rrugëve, trotuareve, hapësirave për biçikleta etj do të vijojnë të jenë prezente. Veliaj shtoi se brenda Verës do të përfundojë Unaza e Vogël e Tiranës, ndërsa projekti për Sheshin Skëndërbej do të nisë shumë shpejti.
“Është shumë kollaj ta shash politikën, por duhet kuptuar që vendimet politike janë ato që vendosin dhe ndryshojnë qytetin… Ndaj do doja të falenderoja katër përfaqësuesit politikë PS, LSI, PDIU dhe FRD që dhanë besimin e tyre për mua si kryebashkiak.
E kemi kthyer Tiranën në punë me 3 turne, që qytetit të ngrihet më i pastër cdo ditë. Tirana ka 1 mln banorë, që do të thotë se ka 1 mln probleme, por nga ana tjetër ka dhe 1 mln mundësi. Sot Bashkia është rritur me 30%.
Ju them se është vetëm çështje kohe… me këtë ritëm nuk është larg dita kur puna të nisë në nivel kapilar. Ju sigurojmë se do të jemi në cdo qelizë të Tiranës. “- tha Kryebashkiaku Veliaj.
Veliaj tha se i duhet dhënë fund gjithashtu edhe paragjykimit se ardhja e njerëzve nga qytetet e tjera në Tiranë, faktikisht nuk është një fenomen negativ, por përkundrazi.
“Shqipëria në vitet 90’ nuk kthehet më. Me qytete fantazëm. Sa të jemi ne gjallë, Tirana do të jetë magneti i zhvillimit social, ekonomik e kulturor. Isha në qytetin studenti dhe i pyeta disa prej tyre se sa nga ata mendonin se do të ktheheshin nëpër qytetet e tyre. Përgjigja ishte që 90% prejt tyre nuk donin të ktheheshin, por donin të qëndronin këtu. Dhe kjo nuk është diçka e keqe, por e mirë… si një mundësi ku secili të ketë shansin që të realizojë ëndrrën e vet në qytetin tonë të bukur.”- tha Veliaj.
Kryebashkiaku Veliaj ka falenderuar gjithashtu edhe këshilltarët bashkiakë të Partisë Demokratike.
“Në këtë vit kemi mundur shumë paragjykime, për mënyrën sesi bëhen punët publike. Dua të falenderoj këshilltarët bashkiakë, të PD, të LSI, por edhe të PD, të cilët kanë qenë mjaft kontruktiv në kritikat e tyre.”- shtoi Veliaj.
