Venezuela po përballet me një nga fatkeqësitë natyrore më të rënda në historinë e saj moderne, pas dy tërmeteve të fuqishme që goditën vendin me vetëm 39 sekonda diferencë. Bilanci vijon të rëndohet nga ora në orë, ndërsa autoritetet njoftojnë se numri i viktimave ka arritur në 920, ndërsa mbi 4 mijë e 300 të tjerë janë plagosur. Më shumë se 50 mijë persona rezultojnë të zhdukur.
Goditjet me magnitudë 7.2 dhe 7.5 shkaktuan shembjen e qindra ndërtesave, dëmtime të rënda në infrastrukturë dhe bllokuan rrugët kryesore në disa zona të vendit. Provinca bregdetare e La Guaira dhe kryeqyteti Karakas janë ndër rajonet më të goditura, ku ekipet e shpëtimit vijojnë kërkimet mes rrënojave për të mbijetuar.
Spitalet po punojnë në kapacitet maksimal, ndërsa mijëra familje kanë mbetur pa strehë. Dëmtime të konsiderueshme janë raportuar edhe në aeroportin kryesor të vendit, duke vështirësuar mbërritjen e ndihmave humanitare. Qeveria ka shpallur gjendjen e jashtëzakonshme dhe ka bërë thirrje për mobilizim të plotë të forcave të emergjencës.
Ndërkohë, komuniteti ndërkombëtar ka shprehur solidaritet me Venezuelën dhe disa shtete kanë njoftuar dërgimin e ndihmave humanitare dhe ekipeve të specializuara të kërkim-shpëtimit. Ekspertët paralajmërojnë se numri i viktimave mund të rritet edhe më tej, pasi shumë persona rezultojnë ende të bllokuar nën rrënoja dhe operacionet e kërkimit vazhdojnë pa ndërprerje.
