Biblioteka Kombëtare vazhdon të qëndrojë e mbyllur pas vërshimit të ujit në katin e nëndheshëm të saj. Pas publikimit të lajmit, drejtuesit e institucionit deklaruan se ajo do të qëndrojë e mbyllur dhe në gjendje emergjence deri në 30 Qershor.
Njoftimi i parë është zëvendësuar nga një i dytë në derën hyrëse, ku nuk përcaktohet një datë se deri kur Biblioteka Kombëtare do të qëndrojë e mbyllur dhe pse.
Nga e shtuna e 23 Qershorit, në dritaret e katit të parë dhe të dytë me dhjetëra libra ngrohen në diell për t’u tharë. Sipas njoftimit të Bibliotekës Kombëtare, e cila nuk vuri në dispozicion një liste të titujve, bëhet fjalë për letërsi artistike dhe libra shkollorë të 15 viteve të fundit. U tha se 75 për qind e tyre u shpëtuan me metoda emergjente dhe profesionale si tharës flokësh, letra thithëse, lënia e dritareve hapur për të qarkulluar ajri dhe nderja e tyre për t’ju kulluar uji.
11 ditë më pas, shkaku që çoi në hapësirat ruajtëse të nëndheshme të shkrimtarisë shqiptare dhe asaj të huaj nuk është identifikuar. Drejtori i Institutit të Ndërtimit, Agron Hysenlliu, institucioni që është angazhuar për zbulimin e shkakut, tha për Televizionin Klan se ekipi i ekspertëve vazhdon punën dhe se ende nuk ka dalë në një konkluzion. /b.d
